Փաստ ինֆո

«Սա էգոցենտրիզմի բարձրագույն աստիճանն է, երբ մարդին իրեն համեմատում կամ իդենտիֆիկացնում է Հիսուս Քրիստոսի հետ»,- «Փաստինֆո»-ի հետ զրույցում նման կարծիք հայտնեց հոգեբան Միհրդատ Մադաթյանը՝ անդրադառնալով ՀՀ վարչապետ Նիկոլ Փաշինյանի հայտարարությանը։

Ըստ հոգեբանի, առհասարակ, բարդույթը՝ լինի Քրիստոսի, թե բդեշխի, լավ բան չէ։ «Եթե նա բարդույթավորված պաշտոնյաներ է ուզում ունենալ, դա մեզ՝ հարկատուներիս չի բավարարում, ես բարդույթավորված պաշտոնյա չեմ ուզում տեսնել իմ կառավարությունում, ես իմ կառավարությունում ուզում եմ տեսնել ազատ մարդ, ով կարողանում է որոշում կայացնել, ադեկվատ է եւ կարողանում է մտածել։ Այստեղ մենք տեսնում ենք, որ Փաշինյանը հասկանում է, որ ադեկվատ կառավարություն չունի ու հոգեբանական խանգարումներից սկսում է ընտրել՝ որն է իրեն ավելի ձեռնտու»,-ասաց Միհրդատ Մադաթյանը։

Հիշեցնենք, վարչապետ Նիկոլ Փաշինյանն այսօր ՀՔԾ-ում հայտարարել է. «Մեր խնդիրն է, որ պետական պաշտոնյաների իշխանի և բդեշխի բարդույթը փոխակերպվի Հիսուսի բարդույթով »։ Ըստ Փաշինյանի, այդ դեպքում պաշտոնյան կհասկանա, որ և՛ տեր է, և՛ ծառա։ Նկատենք, որ սա առաջին դեպքը չէ, երբ Նիկոլ Փաշինյանն իր հրապարակային հայտարարություններում իր իշխանության գործողությունները Քրիստոսի հետ է համեմատում։

Միլանում հայ համայնքի հետ հանդիպմանը ՀՀ վարչապետը հայտարարել էր.««Մենք քարոզում ենք սեր, եկեղեցում ենք մենք գտնվում, ես ինքս, ինչպես մեր Տեր Հիսուս Քրիստոսն էր սեր քարոզում, բայց երբ որ եկավ ժամանակը, նա մտավ տաճարի տարածք և շուռ տվեց սեղանները՝ ասելով, որ այս սրբության տաճարը դուք դարձրել եք առևտրի և դալալության միջավայր: Նույնիսկ Հիսուս Քրիստոսը մտավ տաճար և շուռ տվեց էն սեղանները, որտեղ պղծվում էին սրբությունները»:

Առհասարակ, վերլուծելով Նիկոլ Փաշինյանի հայտարարությունները, Միհրդատ Մադաթյանն ասաց՝ ի սկզբանե Նիկոլ Փաշինյանը սեր ու հանդուրժողականություն չի քարոզել եւ դա մանիպուլյացիա է։ «Թավշյա հեղափոխությունը եղավ սիրո եւ հանդուրժողականության կարգախոսներով, բայց բերեց ատելություն եւ անհանդուրժողականություն, որը մինչեւ հիմա մենք տեսնում ենք՝ սեւ ու սպիտակի բաժանելը, ասֆալտին փռելը, պատերին ծեփելը եւ այլն»։

Ըստ հոգեբանի, այն բանի մասին, ինչ անձն ինքը չունի, սկսում է շատ խոսել։ «Սովորաբար, մարդիկ, երբ որ սիրում են, դրա մասին չեն պատմում, երբ հանդուրժում են, այդ մասին չեն հռչակում, սրանք ներքին կատեգորիաներ են, որը մենք ինքներս անում ենք»,-նշում է Մադաթյանը։

Հարցին՝ լինել եւ տեր, եւ ծառա հայտարարությունը գուցե ա՞յլ մեսիջ է պարունակում, այն իմաստով, որ այսօր գործող իշխանությանը շատ են քննադատում տարբեր քայլերի համար, հոգեբանն արձագանքեց. «Փաշինյանի մեսիջները գուցե մեկնաբանեն բժիշկ հոգեթերապեւտները, հոգեբույժները, այս պահին ասել, թե ինչ է նա ցանկացել ասել, կլինի մոտավորապես այն, որ հիմա նստենք ու աշխարհի վերջը կանխատեսենք։ Դուք ինքներդ չե՞ք տեսնում, որ ադեկվատ վարքագիծ չի դրսեւորում, ի՞նչ է նշանակում անալոգիա տանել իր եւ Հիսուսի հետ, ես ասել եմ ու էլի կասեմ՝ Ավանի համապատասխան հաստատությունում բազմաթիվ հիսուսներ են ապրում եւ նույնիսկ նիկոլփաշինյաններ, վստահ եմ»։

Հայաստանում պաշտոնյաների բդեշխի բարդույթը պետք է փոխակերպվի Հիսուսի բարդույթով. Նիկոլ Փաշինյան (տեսանյութ)

Աղբյուր` Փաստինֆո