Փաստ ինֆո

Իբր Հայաստանում աշխատավարձերն այնքան բարձր են, հիմա էլ կառավարությունն ուզում է դրանից լրացուցիչ հարկ գանձել։ Այն էլ ոչ ավել, ոչ պակաս` 6 տոկոսի չափով։ Ու դա ակնկալվում է անել առողջության համապարփակ ապահովագրության ներդրման շրջանակներում։ 

Ինչպես հայտնի է, կառավարությունը շրջանառության մեջ է դրել մի նախագիծ, որով նախատեսում է անցում կատարել համընդհանուր ապահովագրության։ Դրա համար առաջարկվում է սահմանել առողջապահության հարկ, որը պիտի վճարի աշխատողը` սեփական աշխատավարձից։

Որ առողջության պարտադիր ապահովագրությունն անհրաժեշտություն է, այդպես էլ կա։ Քաղաքակիրթ աշխարհը գնում է այդ ճանապարհով։ Բայց դրա համար նախ անհրաժեշտ է ստեղծել բավարար հիմքեր։ Իսկ Հայաստանում նման հիմքեր բացարձակապես չկան։ Այսպես` գնալու դեպքում, առաջիկայում չեն էլ լինելու։

Առողջության պարտադիր ապահովագրության անցնելուց առաջ նախ պետք է մտածել մարդկանց արժանապատիվ աշխատավարձ վճարելու մասին։ Այսօր աշխատողների 60 տոկոսի աշխատավարձը Հայաստանում 150 հազար դրամից ցածր է։ Խոսքը վերաբերում է 360 հազար մարդու։ Մինչ նրանք չեն կարողանում գոյատևել ստացած խղճուկ աշխատավարձերով, հիմա էլ դրանից 6 տոկոս մասհանում պիտի կատարեն առողջապահության հարկի տեսքով։

Սոցիալական առումով 6 տոկոսանոց հարկային բեռը մեծ ծանրություն է շատերի համար։ Այնինչ, դա շատ ավելի քիչ կարող էր լիներ, եթե կառավարությունը նախապես մտածեր մարդկանց աշխատանքով ապահովելու մասին։

Պաշտոնական տվյալներով, այսօր Հայաստանում շուրջ 250 հազար գործազուրկ կա։ Ու եթե այդ մարդիկ աշխատանք ունենային, ապա առողջապահության հարկի բեռը անհամեմատ ավելի ցածր կլինի, քան առաջարկվող 6 տոկոսն է։

Առողջության համապարփակ ապահովագրության անցնելուց առաջ այս խնդիրներն է պետք լուծել։ Եվ ոչ միայն դրանք։ Պետք է մտածել նաև առողջապահական ծառայությունների պատշաճ մատուցման և սպասարկման որակի բարձրացման, ապահովագրության հասանելիության ու մատչելիության ապահովման մասին։

Ըստ էության, այսօր էլ Հայաստանում կա նման ծառայություն` նույն սոցիալական փաթեթի շրջանակներում, որը տրամադրում է պետությունը։ Բայց կառավարությունը գոնե գիտի՞, թե այն ինչքանո՞վ է ծառայում իր նպատակին։

Այնպես չէ, որ բժշկական համընդհանուր ապահովագրության ներդրման գաղափարը նոր է ի հայտ եկել և նախկինում չկար։ Այդ մասին շատ վաղուց է խոսվում։

Բայց նախկինում որևէ կառավարություն չգնաց դրան` հաշվի առնելով առկա բազմաթիվ խնդիրներն ու մարտահրավերները։

Եթե այսօր կառավարությունը պատրաստվում է անտեսել դրանք ու գնալ համընդհանուր ապահովագրության ներդրման, ապա պետք է բարի լինի շատ ավելի մեծ բեռ ստանձնել։ Եվ ոչ թե հասարակության, առանց այն էլ խղճուկ աշխատավարձերի հաշվին` փորձի իր ուսերից գցել մարդկանց առողջության ապահովման պարտավորությունը

Աղբյուր` Փաստինֆո