Փաստ ինֆո

Պահման պայմանների բարելավման և քրեակատարողական օպտիմալացման շրջանակներում նախատեսվում է փակել «Նուբարաշեն» և «Դատապարտյալների հիվանդանոց» քրեակատարողական հիմնարկները։ Այս մասին կառավարության այսօրվա նիստում հայտարարեց Արդարադատության նախարար Ռուստամ Բադասյանը՝ ներկայացնելով նախարարության 2019-2023 թթ. Ռազմավարության ծրագիրը։

«Երևանի տարածքում՝ Սիլիկյան թաղամասում կառուցել շուրջ 1200 լրակազմ ունեցող քրեակատարողական նոր հիմնարկ՝ 200 մահճակալ նախատեսվելու է բուժման կարիք ունեցող անձանց համար»,-նշեց նախարարը։

Ռուստամ Բադասյանը նաև հավելեց, որ նախատեսվում է փակել «Գորիս» քրեակատարողական հիմնարկը և կառուցել 350 լրակազմ ունեցող քրեակատարողական նոր հիմնարկ. «Նախագիծն արդեն առկա է։ Նախատեսվում է քրեակատարողական հիմնարկը կառուցել Խնձորեսկում։ Երևան-կենտրոն քրեակատարողական հիմնարկը ԱԱԾ-ի վարչական շենքից տեղափոխել նախկին Էրեբունի քրեակատարողական հիմնարկի մասնաշենք։ Փակել «Հրազդան» քրեակատարողական հիմնարկը և «Սևան» քրեակատարողական հիմնարկի վարչական տարածքում կառուցել «Հրազդան» քրեակատարողական հիմնարկի համար սահմանված լրակազմով փակ, կիսափակ ռեժիմներով և կալանավորվածներին պահելու վայր»,-հավելեց Ռուստամ Բադասյանը։

Նա նշեց, որ 2020 թվականից քրեակատարողական հիմնարկներում սննդի մատակարարման գործառույթն ամբողջությամբ պատվիրակվելու է մասնավոր հատվածին։ Բոլոր 12 քրեակատարողական հիմնարկներում 2020 թվականի տարբեր փուլերում կներդրվի մասնավորին սննդի մատակարակման գործառույթը։

Հաջորդ ուղղությունը քկհ-ներում հաշմանդամություն ունեցող անձանց պահման մատչելի պայմանների ապահովությունն է, որի շրջանակներում առաջարկվում է հաշմանդամություն ունեցող անձանց համար ապահովել մատչելի պայմաններ՝ թեքահարթակներ, բազրիքներ, համապատասխան սանհանգույցներ։
Ազատությունից զրկված անչափահաս անձանց պահման պայմանների բարելավման ռազմավարական ծրագրով նախատեսվում է քրեակատարողական հիմնարկներում ապահովել հանրակրթության իրականացման շարունակականություն։

Կոռուպցիայի և քրեական ենթամշակույթի հաղթահարման ուղղությամբ ռազմավարական միջոցառումներով նախատեսվում է իրականացնել ընդհանուր աուդիտ.

«Քրեակատարողական հիմնարկներն անհրաժեշտ է վերազինել հսկողության միջոցներով։ Հսկողության գործիքների արդիականացումն առաջին հերթին ենթադրում է քրեակատարողական հիմնարկները ժամանակակից տեսադիտման համակարգերով վերազինելուն, ինչը հնարավորություն կտա ստեղծել օպերատիվ կառավարման կենտրոն և առցանց ռեժիմով իրականացվող հսկողության պայմաններում բացառել քրեակատարողական հիմնարկներում տարածված այնպիսի կոռուպցիոն երևույթներ, ինչպիսիք են հավելյալ զբոսանքը, կրճատված կարանտինային ժամանակահատվածը, հանձնուքները չստուգելը և այլն»,-հավելեց Ռուստամ Բադասյանը։

Հեղինակ՝ Հասմիկ Կոշկարյան

Աղբյուր` Փաստինֆո