Փաստ ինֆո

«Այսօրվա հրավիրյալը Հայաստանի սահմաններից դուրս է գտնվում և շատ կարևոր հրավիրյալների շարքից է, և ինքն, ըստ էության, առնչվում է 2016թ-ի մեր հետախուզության ոլորտի հետ ու քանի որ սահմանից դուրս է գտնվում, մենք քննարկեցինք և գտանք այն ձևաչափը, որի շնորհիվ շփում ենք ունենալու գնդապետ Հովհաննիսյանի հետ»,-այս մասին այսօր լրագրողների հետ ճեպազրույցում ասաց Ապրիլյան քննիչ հանձնաժողովի նախագահ, ԱԺ «Իմ քայլը» խմբակցության պատգամավոր Անդրանիկ Քոչարյանը։ 

Լրագրողներից մեկի դիտարկմանը, թե գնդապետ Հովհաննիսյան ազգանունն ասացիք, նա ի՞նչ պաշտոն է զբաղեցրել, հանձնաժողովի նախագահը նախ պատասխանեց ասելով, որ կարող է սխալվել է ազգանվան հարցում, ապա հավելեց. «Նա բավականին բարձր պաշտոն է զբաղեցրել հետախուզության համակարգում, հիմա էլ բավականին բարձր պաշտոն է զբաղեցնում Հայաստանի սահմաններից դուրս»։

Նա նաև հայտնեց, որ որոշում է կայացվել դիմել ԱԺ նախագահին քննիչ հանձնաժողովի գործունեության ժամանակն երկարացնելու համար։

«Մենք չենք տեղավորվում այս ժամկետում հաշվի առնելով մարդկանց քանակը և նյութերի հսկայական ծավալը։ Էլ չեմ ասում, որ դրանց եզրահանգումների վրա վերջնական փուլում կարծես գալիս ենք բուռն գործունեության հատվածին և մենք կանգնելու իրավունք չունենք, դրա համար էլ դիմում ենք ԱԺ նախագահին, որպեսզի ժամանակը երկարացնի։ Նշել ենք, որ երկարացնի մինչև 6 ամիս, բայց դա չի նշանակում, որ աշխատանքները 6 ամիս կտևեն, մենք ավելի շուտ կավարտենք»,-ասաց Քոչարյանը։

Հեղինակ՝ Սոնա Գեւորգյան

Աղբյուր` Փաստինֆո