Փաստ ինֆո

Սևազգեստ մայրերը կրկին բողոքի ակցիա են իրականացնում Կառավարության դիմաց։

«Մեր բողոքից անցել է գրեթե 4 ամիս, մենք քննարկումներին մասնակցում ենք, նույնիսկ ես առաջարկեցի, որ լինի պատշաճ թոշակ, որ մայրերը միակ կերակրողին կորցնելուց հետո ստանան պատշաճ թոշակ և ապահովեն իրենց ապրելակերպը, սակայն անցել է բավականին ժամանակ և խնդիրը չի լուծվել»,-այս մասին այսօր լրագրողների հետ ճեպազրույցում ասաց մայրերից Մարգարիտա Խաչատրյանը։

Նա նշեց, որ կառավարության անդամների քննարկման արդյունքում որոշում է կայացվել, որ մարտի 1-ի սպանվածների ընտանիքներին տրամադրվի 30 մլն դրամ, իսկ խաղաղ պայմաններում, պատերազմի ժամանակ զոհվածների ընտանիքներին՝ անտեսել։

«Մենք գտնում ենք, որ մեր պահանջն արդարացի և տեղին է։ Այն չափորոշիչը, որ կիրառել են մնացածի նկատմամբ, թո՛ղ նույնը կիրառեն զոհվածների ընտանիքների նկատմամբ։ Կառավարությունից պահանջեցինք կոդավորման համարը՝ ո՞ր հաշվեկշռով, ո՞ր որոշմամբ ֆինասների նախարարությունը բավականին մեծ գումար բաց թողեց մահացածների համար. 30մլն, 25մլն, 15մլն, իսկ ոչ մի անգամ չի անդրադառնում զոհվածների ընտանիքներին»,- ասաց Խաչատրյանն ու ավելացրեց՝ վիրավորական է, զինվորը երկիրը պաշտպանում է, բայց կառավարությունն անտեսում է դա։

 «Եթե մեր տղերքը հիմա անձրևի ու ձյան տակ են, մենք՝ մայրերս չենք հալվի։ Մենք էլ կկանգնենք անձրևի ու ձյան տակ»,-ավարտելով խոսքն ասաց Խաչատրյանը։

Հեղինակ՝ Սոնա Գեւորգյան

Աղբյուր` Փաստինֆո