Փաստ ինֆո

‹‹Փաստաբան Հովհաննես Չամսարյանի աշխատասենյակում կատարված խուզարկության և համակարգչի առգրավման գործընթացը դիտարկում եմ ուղղակի սպառնալիք ՀՀ փաստաբանական համայնքի, մարդու իրավունքների պաշտպանության և ՀՀ օրենսդրության նկատմամբ: Յուրաքանչյուր ողջամիտ մարդու կամ իրավաբանի համար ակնհայտ է, որ տեղի է ունեցել ոչ իրավաչափ գործողություն, որի արդյունքում կոպտորեն խախտվել է ‹‹Փաստաբանության մասին›› ՀՀ օրենքը››,- ‹‹Փաստինֆո››-ի հետ զրույցում նման կարծիք հայտնեց փաստաբան Նորայր Նորիկյանը:

Հիշեցնենք, որ նոյեմբերի 25-ին ԱԱԾ քննչական դեպարտամենտի ավագ քննիչ Օնիկ Առաքելյանի կողմից խուզարկություն է իրականացվել փաստաբան Հովհաննես Չամսարյանի աշխատասենյակում, որի ժամանակ փորձ է կատարվել առգրավել նաև փաստաբանի համակարգիչները: Սակայն ՀՀ փաստաբանների պալատի ներկայացուցիչների, այլ փաստաբանների, ինչպես նաև ՀՀ մարդու իրավունքների պաշտպանի գրասենյակի ներկայացուցիչների իրավական համապատասխան պարզաբանումների արդյունքում քննիչը համակարգիչները վերադարձրել է փաստաբան Հովհաննես Չամսարյանին, սակայն պահանջել է թույլատրել զննել դրանց պարունակությունը տեղում, որի դեմ փաստաբան Հովհաննես Չամսարյանն առարկել է:

Փաստաբան Նորիկյանի կարծիքով պետական մարմինների կամ ընդհանրապես իրավական համակարգի ներկայացուցիչների մոտ կա այնպիսի տպավորություն, որ ‹‹Փաստաբանության մասին›› ՀՀ օրենքն իրենց համար կիրառելի չէ. ‹‹Պետք է գիտակցել, որ ՀՀ յուրաքանչյուր օրենք գործողության մեջ է դրված ՀՀ ողջ տարածքով, պարտադիր է բոլորի համար, և իրենք պարտավոր են առաջնորդվել նաև այդ օրենքով: Անկախ անձից, անկախ փաստաբանի ով լինելուց՝ փաստաբանության և ընդհանրապես փաստաբանի նկատմամբ իրականացված ցանկացած ոտնձգություն ուղղակի սպառնալիք է ՀՀ Սահմանադրությանը, իրավական պետության փիլիսոփայությանը և մարդու իրավունքների պաշտպանության ամբողջ գաղափարախոսությանը:

Զննելով այդ համակարգիչը կամ խուզարկություն իրականացնելով փաստաբանական գրասենյակում, որևէ երաշխիք չկա, որ քննություն կամ զննություն իրականացնող մարմինը կարող է իր տիրապետման ներքո վերցնել այնպիսի տեղեկություններ, որոնք հանդիսանում են փաստաբանական գաղտնիք և դրա արդյունքում ամբողջովին կխաթարվի պաշտպանության իրավունքը›: Հարցին արդյո՞ք այս քայլի միջոցով վախի մթնոլորտ ձևավորելու փորձ է կատարվում, փաստաբանը հայտնեց, որ եթե եղել է նման մտադրություն, ապա ճիշտ հակառակ պրոցեսն է տեղի ունեցել, քանի որ փաստաբանական համայնքն այս առումով միասնական մոտեցում է ցուցաբերել, ինչն ըստ փաստաբանի ողջունելի է: Նորայր Նորիկյանը նաև նշեց, որ անկախ նրանից ով է իշխանության այսօրվա կրողը, անկախ նրանից ով է երկրի նախագահը, վարչապետը և ուժային կառույցների ղեկավարները՝ իրավապահ մարմինները պարտավոր են առաջնորդվել ՀՀ օրենսդրությամբ, տառին և ոգուն համապատասխան:

‹‹Եթե մենք խնդիր ենք դրել իրավական պետություն կառուցելու, որտեղ իսկապես հնարավորություն կլինի իրականացնել արդարադատություն և ունենալ անկախ դատական համակարգ, պետք է զերծ մնանք այսպիսի կամայական քայլերից››: Անդրադառնալով ԱԱԾ հայտարարությունը, որում մասնավորապես ասվում էր, որ փաստաբանի արտոնագիրն ամենաթողության երաշխիք չէ, Նորայր Նորիկյանը հայտնեց, որ ընդհանրապես որևէ մեկին տրված չէ ամենաթողությամբ զբաղվելը՝ կլինի փաստաբան, քննիչ, դատախազ, դատավոր, թե ուժային կառույցի ներկայացուցիչ: ‹‹Ես կարծում եմ, որ բոլոր դեպքերում ‹‹Փաստաբանության մասին›› ՀՀ օրենքը, իսկ, մասնավորապես այդ օրենքի 21-րդ հոդվածը որոշ սուբյեկտներ պետք կարդան և գիտակցեն, որ սեփական իրավունքների պաշտպանությունը չի կարելի շփոթել ամենաթողության հետ: Տվյալ դեպքում մենք գործ ունենք փաստաբանական համայնքի կողմից դրսևորված վարքագծի հետ և փաստաբանական համայնքը դրսևորել է օրինական վարքագիծ՝ մատնացույց անելով օրենքի այն դրույթը, որը խստիվ արգելում է ՀՀ որևէ մարմնի կամ անձի դուրս գալ այդ օրենքի դրույթի շրջանակներից և իրականացնել այնպիսի քայլեր, որոնք չեն բխում փաստաբանության օրենքից››,-եզրափակեց Նորայր Նորիկյանը:

Աղբյուր` Փաստինֆո