Փաստ ինֆո

 «Ես դիմել էի Գերմանիա Նիկոլ Փաշինյանի առողջական վիճակի հետազոտման համար և դրա հետ կապված նաև դրամահավաք էի հայտարարել։ Այն տարբեր ձևերով է իրականացվում, ինչպես բանակին փոխանցումների տեսքով, այնպես էլ առձեռն՝ տուփերի մեջ։ Հիմնականում, իհարկե, քաղաքացիները գցում են 10-20 դրամանոցներ, որովհետև ավելին Նիկոլ Փաշինյանին փոխանցելու կարիք չկա՞,-այս մասին այսօր լրագրողների հետ ճեպազրույցում ասաց Կառավարության դիմաց բողոքի ակցիա իրականացնող Մարինա Խաչատրյանը։

Նա նշեց, որ իր հավաքած գումարը պատրաստվում է փոխանցել ընդունարան. «Ես պարբերաբար հրապարակում եմ կլինիկական նշաններ, որոնք բարձրաձայնվում են տարբեր մարդկանց կողմից և ակնառու են, դրանք բոլորն են տեսնում, և ես որպես ՀՀ քաղաքացի պահանջում եմ, որ Նիկոլ Փաշինյանի հոգեկան առողջության վիճակը հետազոտվի»։

Նա հայտնեց, որ գումարը հավաքվել է փողոցները շրջելով և 26 հազար եվրո գումար է անհրաժեշտ, որպեսզի Փաշինյանին ուղարկեն հոգեբուժական կլինիկա։

«Կարծում եմ՝ Նիկոլ Փաշինյանը չպետք է հրաժարվի, նա բազմիցս հայտարարել է, որ ժողովուրդն է որոշում, թե ՀՀ-ում ինչ պետք է լինի»,-ասաց Մարինա Խաչատրյանը։

Հարցին, որքանո՞վ է կոռեկտ, որ անձի առողջական վիճակն եք բարձրաձայնում, նա պատասխանեց. «Այս իրավունքն ինձ տվել է Արսեն Թորոսյանը, երբ Հանրային հեռուստաընկերության եթերում հայտարարեց, որ Արցախի հերոս, գեներալ Վիտալի Բալասանյանը հոգեկան խնդիրներ ունի և հոգեբույժական կլինիկա պետք է գնա հետազոտվելու»։

Հեղինակ ՝ Սոնա Գեւորգյան

Աղբյուր` Փաստինֆո