Փաստ ինֆո

Ավտոներկրողները բողոքի ակցիա են իրականացրել ՊԵԿ-ի շենքի առջեւ, որն անցել է լարված մթնոլորտում։ Բողոքի ակցիայի մասնակիցները մի շարք հարցեր են բարձրացնում ՝ Գյումրու ավտոմաքսատան աշխատանքի անարդյունավետությունից մինչեւ աջ ղեկով մեքենաների ներկրման արգելքը։

Ակցիայի սկզբում ցուցարարներին մոտեցավ ՊԵԿ խոսնակ Լուսինե Մկրտչյանը՝ հասկանալու նրանց պահանջները։ «Մաքսատունը արդյունավետ չի աշխատում, ինչի հետեւանքով ներկրված մեքենաները բեռնաթափելիս վնասվածքներ են ստանում։ Կարո՞ղ եք հրապարակել՝ ով է այդ ընկերության սեփականատերը։ Իմ՝ ոչ պաշտոնական տվյալներով, Գյումրու մաքսատան պետն է»,-նրան դիմելով, հայտարարեց Գեւորգ Հովհաննիսյանը, ով ներկայացնում էր ավտոներկրողների խնդիրները ։ ՊԵԿ խոսնակն առաջարկեց գրավոր ներկայացնել պահանջները, որոնց համապատասխան մասնագետները կպատասխանեն։ Խոսակցությունը չստացվեց , ՊԵԿ խոսնակը հեռացավ,իսկ ակցիայի մասնակիցները շարունակեցին մնալ ՊԵԿ շենքի առջեւ։

«Այսօր ՊԵԿ-ի քաղաքականության եւ վարչարարության հետեւանքով ադրբեջանական գործարար հատվածը ֆինանսավորում է ստանում, սա ուղղակի մեղադրանք եմ հնչեցնում, թող մեկը կանգնի, ինձ ասի՝ նման բան չկա»,- Գեւորգ Հովհաննիսյանը։ Նրա խոսքով, աջ ղեկով մեքենաների ներկրման արգելքից հետո Հայաստան բերվող մեքենաները Վրաստանում են վերասարքավորվում, ինչի արդյունքում եկամուտը տեղի ադրբեջանցի գործարարներն են ստանում, որոնք իրականացնում են այդ ծառայությունը։ Բացի այս, ըստ Հովհաննիսյանի, Գյումրու ավտոմաքսատունը ոչ արդյունավետ է աշխատում։ «Նախ՝ մեքենաները ինչո՞ւ պետք է հասնեն Գյումրի, եթե ՀՀ-ում կա մեքենա ներկրող կազմակերպություն՝ «Ապավեն»-ը, որի մեքենաները չեն տանում Գյումրի, ինչու պետք է մասնավոր ձեռնարկատերերինը գնա հասնի Գյումրի»,-նշեց նա՝ հավելելով, որ ավտոներկրողները ֆինանսական ծախսեր ու անհարմարություններ են կրում։

Նա հայտարարեց, որ կառավարությունն իր որդեգրած քաղաքականությամբ խախտել է ՀՀ Սահմանադրությունը՝ գործարար միջավայրի բարելավումից մինչեւ բնակչության զբաղվածության համար պայմանների ստեղծման պարտավորություն։ «Մեր պետության սահմանած կարգերի հետեւանքով զբաղվածներն իրենց զբաղմունքը կորցնում են։ Մինչեւ տարեվերջ 10 միլիոն դոլար գումար ենք ուղարկելու Վրաստան, որն անցնում է ադրբեջանցիներին, որոնք զբաղվում են այդ գործով»,-հայտարարեց Գեւորգ Հովհաննիսյանը։

Այնուհետեւ Գեւորգ Հովհաննիսյանը զանգեց ՀՀ ոստիկանապետի ԺՊ-ին եւ հեռախոսազրույցի ընթացքում ասաց, որ ակցիայի մասնակիցները ցանկանում են հանդիպել վերջինիս, ինչպես նաեւ ՊԵԿ նախագահի 1-ին տեղակալ Ռաֆիկ Մաշադյանի հետ՝ ՀՀ վարչապետի ներկայությամբ։ «Մեզ ուրիշ բան են ասում, գնում են Փաշինյանին այլ բան են ասում»,-նշեց նա։

Ակցիայի ընթացքում ոստիկանության ներկայացուցիչների եւ ավտոներկրողների միջեւ հրմշտոց սկսվեց ։ Ոստիկանությունը պահանջել է ազատել փողոցը եւ հեռացնել այնտեղ կայանած մեքենաները, որոնք խոչընդոտել են երթեւեկությանը, ինչից հետո բողոքի ակցիայի մասնակիցները հայտարարել են, թե վերեւից հրահանգ է իջեցվել՝ ցրել ակցիան։

Ի վերջո, հաջողվեց համաձայնության հասնել, որոշվեց՝ ՊԵԿ ներկայացուցիչների հետ ակցիայի մասնակիցներից կազմված 10 հոգանոց պատվիրակությունը կհանդիպի երեկոյան՝ ժամը 19։00-ին եւ կքննարկի բարձրաձայնվող խնդիրները։

Մանրամասները՝ տեսանյութում

Աղբյուր` Փաստինֆո