Փաստ ինֆո

«Եթե Արթուր Վանեցյանը փաստեր և ասելիք ուներ, ապա պետք է պաշտոն զբաղեցրած ժամանակ ասեր։ Եթե ես դժգոհ եմ որևէ ընթացակարգից, ապա այսօր պետք է ասեմ, նորմալ չէ, որ, լինելով ԱԺ պատգամավոր լռեմ ու դուրս գալուց հետո ասեմ ինչ սխալ օրենքներ եք ընդունել»,-այս մասին այսօր լրագրողների հետ ճեպազորւյցում ասաց ԱԺ «Իմ քայլը» խմբակցության պատգամավոր Նիկոլ Բաղդասարյանը։

Դիտարկմանը, թե Վանեցյանն ասում է՝ Սորոսի գրասենյակը վտանգներ է ներկայացնում, «Իմ քայլը» պատգամավորը պատասխանեց. «Սորոսի գրասենյակի վտանգ ներկայացնելն ինձ համար ծիծաղելի է, որովհետև գիտեմ՝ այն գործում է տարիներ շարունակ։ Բա ինչու՞ իրենց իշխանության ժամանակ, երբ պետական հիմնարկները Սորոսի հիմնարկից ֆոնդեր էին ստանում, ձայն չէին հանում»։

Նա նշեց՝ տպավորություն է, որ Վանեցյանը նեղացած տղայի դերն է ստանձնել։

Անդրադառնալով Գևորգ Կոստանյանին Հայաստան կանչելուն և մարտի 1-ի գործում նրա ներգրավվածությանը՝ Բաղդասարյանն ասաց. «Եթե որպես իրավաբան եք հարցնում, ապա այն ինչ ասվում է մեր պետության քննիչի կողմից, գրված է քրեական դատավարության օրենսգրքի մեջ՝ երբ որոշում են կայացնում անձին որպես մեղադրյալ ներգրավվել, ապա նա 48 ժամվա ընթացքում պետք է հարցաքննվի։ Կարծում եմ, Կոստանյանը պետք է լավ տիրապետեր օրենսգրքին։ Ինչ վերաբերում է պնդումներին, թե ինչու առերեսումներ չեն կատարվել, ապա կասեմ, որ պարտադիր չէ քրեական գործով անձին մեղադրյալ ներգրավվելուց առաջ անպայման առերեսում կատարել... 48 ժամում հարցաքննվելը Կոստանյանի իրավունքն է, եթե նա չի ցանկանում դրանից օգտվել՝ այլ խնդիր է։ Եթե Կոստանյանը չներկայանա վարույթն իրականացնող մարմնին, ապա այս մարմինը կարող է կիրառել խափանման միջոց, դիցուք՝ մինչև խափանման միջոցը կալանքն ընտրելը, դիմի դատարան, որպեսզի ընտրվի խափանման միջոց կալանքը, հետախուզում հայտարարվի և միջոցներ ձեռնարկի օրենքի ուժով անձը բերման ենթարկվի Հայաստան»։

Խոսելով Կոստանյանի հայտարարության մասին, թե իրեն Հայաստան կանչելն ամանորյա շոու է՝ Բաղդասարյանն ասաց, որ, հավանաբար, Կոստանյանը նման կերպ է որոշել կազմակերպել իր պաշտպանությունը։

Հեղինակ՝ Սոնա Գեւորգյան

Աղբյուր` Փաստինֆո