Փաստ ինֆո

Երեւանի ընդհանուր իրավասության դատարանում շարունակվում է ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստը։
«Փաստինֆո»-ի հաղորդմամբ՝ Ռ.Քոչարյանի փաստաբան Հ.Խուդոյանն բացարկի միջնորդություն ներկայացրեց դատախազ Կարեն Բիշարյանին։

Հովհաննես Խուդոյանը նկատեց, որ դեռևս 2018 թվականի փետրվարի 23-ին ՀՀ ԱԺ-ում հրավիրված քննարկումների ընթացքում, որը վերաբերում էր Մարտի 1-ի իրադարձություններին, դատախազ Բիշարյանն ԱԺ ամբիոնից, պատասխանելով հարցին՝ արդյոք վարույթում հիմքեր առկա չեն նախկին նախագահ Ռոբերտ Քոչարյանին, նախկին գեներալներ, գնդապետ և ավելի բարձր կոչում ունեցող անձանց վերաբերյալ քրեական գործով ընթացք տալու և այդ անձանց պատասխանատվության հարցը քննարկելու, Ռոբերտ Քոչարյանի վերաբերյալ Կարեն Բիշարյանը դիրքորոշում է հայտնել, որ նման հիմքեր առկա չեն և նույնիսկ որպես վկա հրավիրելու անհրաժեշտություն չկա.

«Այստեղ խնդիրն այն է, որ հետագայում որոշակի քաղաքական փոփոխությունների արդյունքում սկսվել է մի պրոցես, որի պարագայում արդեն գլխավոր դատախազությունը, այդ թվում պարոն Բիշարյանը տեսել է հիմքեր՝ քրեական հետապնդում իրականացնելու համար։

Մինչդեռ այդպիսի հիմքեր առկա են եղել դեռևս պարոն Բիշարյանի հիշյալ հայտարարության ընթացքում։ Այսինքն` հայտնի է եղել և՛ նախագահի հրամանագիրը, որի մեջ նշված է ուղղակի արտակարգ դրության միջոցառումների իրականացման վերապահումը զինված ուժերի ստորաբաժանումներին։ Հայտնի է եղել, որ արդեն իսկ բարձրացվել է Մարտի 1-ին զինված ուժերի ստորաբաժանումների Երևանում գտնվելու մասին հարցը»,-նշեց Հովհաննես Խուդոյանը։

Նա ընդգծեց, որ Ռոբերտ Քոչարյանի մեղադրանքի հիմքում դրված բոլոր փաստական հանգամանքներն առկա են եղել դեռևս 2018 թվականի փետրվարի 23-ին և փաստաբանի վստահեցմամբ Կարեն Բիշարյանը դրանց մասին տեղյակ է եղել, ինչն իրենց համար վկայում է այն մասին, որ քաղաքական որոշակի փոփոխությունների արդյունքում Կարեն Բիշարյանը կանխակալ վերաբերմունք ունի և այդ վերաբերմունքը դրսևորում է քրեական գործով Ռոբերտ Քոչարյանի նկատմամբ հետապնդում նախաձեռնելու համար. «Գտնում ենք, որ պարոն Բիշարյանը կանխակալ վերաբերմունք ունի պարոն Քոչարյանի նկատմամբ և չի կարող սույն գործով մասնակցել որպես մեղադրող»,-հավելեց Հովհաննես Խուդոյանը։

Հիշեցնենք, որ նախորդ նիստում պաշտպանական կողմը միջնորդություն ներկայացրին դատախազ Պետրոս Պետրոսյանի բացարկի մասին։ Դատավոր Աննա Դանիբեկյանը մերժեց միջնորդությունը։

«Յուրաքանչյուր նման որոշումից հետո ամրապնդվում է այն կարծիքը, որ այս դատավարությունը կապ չունի արդարադատության հետ, եւ դատավորը կանխակալ վերաբերմունք է դրսեւորում»,- ասել է Հայաստանի երկրորդ նախագահ Ռոբերտ Քոչարյանի փաստաբան Հովհաննես Խուդոյանը լրագրողների հետ զրույցում՝ մեկնաբանելով դատավորի որոշումը։

Աղբյուր` Փաստինֆո