Փաստ ինֆո

ՀՀ երկրորդ նախագահ Ռոբերտ Քոչարյանի նկատմամբ գրավ կիրառելու գործով դատական նիստը վերաքննիչ քրեական դատարանում հետաձգվեց։ 

Նշենք, որ դատական նիստին ծանուցվել և ներկայացել էր տուժող կողմի իրավահաջորդի ներկայացուցիչ Մարինա Պողոսյանը, իսկ տուժող կողմի ներկայացուցիչ Տիգրան Եգորյանը միջնորդություն էր ներկայացրել՝ խնդրելով դատարանին հետաձգել դատական նիստը։ Տուժող կողմին ներգրավվելուն դեմ էին Ռոբերտ Քոչարյանի պաշտպանական թիմի ներկայացուցիչները։ Հայկ Ալումյանը նշեց, որ սույն գործի անջատված մասով որևէ անձ ճանաչված չէ տուժող կամ տուժողի իրավահաջորդի ներկայացուցիչ և, որ բացի պաշտպանական և մեղադրող կողմերից որևէ մեկը չունի իրավաչափ շահ և չի կարող որևէ մեկը բացի այս կողմերից մասնակցել դատական նիստին։

Արամ Վարդևանյանը միացավ Հայկ Ալումյանի դիրքորոշմանը և նշեց, որ հանրային շահը ներկայացնում է մեղադրող կողմը՝ հանձինս դատախազների և Ռոբերտ Քոչարյանի։ Մեղադրող դատախազ Գևորգ Բաղդասարյանն, ի պատասխան պաշտպանական կողմի, ասաց, որ այս գործով որպես տուժող կողմ ճանաչված անձինք կան և, որ տուժող կողմը պետք է նաև պատշաճ կերպով ծանուցվի։
Ինչ վերաբերում է Ռոբերտ Քոչարյանի՝ նիստերի մասնակցությանը, Հայկ Ալումյանը նշեց, որ հաջորդ դատական նիստից մեկ-երկու օր առաջ պարոն Քոչարյանի դիրքորոշումը կներկայացվի գրավոր։

Դատաքննությանը մասնակից կողմերի մասնակցության մասին նախագահող դատավոր Մխիթար Պապոյանը նշեց, որ պետք է ներկայանան բոլոր կողմերը՝ բացի վկաներից։ Մխիթար Պապոյանի խոսքով՝ բողոքարկվող դատական ակտը ներկայացվել է գործի քննության ընթացքում և այդ ընթացքում տուժողները, իրավահաջորդների ներկայացուցիչները և ամբաստանյալները ներկա են եղել։

«Այդ անձինք, ցանկացած միջնորդության վերաբերյալ ունեն կարծիք հայտնելու իրավունք և, այդ իրավունքից ելնելով, դատարանը գտնում է, որ նրանք ունեն դիրքորոշումը ներկայացնելու իրավունք »,- ասաց Պապոյանը։
Խնդրի լուծման համար Վերաքննիչ դատարանը կդիմի առաջին ատյանի դատարանին՝ խնդրելով ստանալ դատակոչի ցուցակը և ծանուցել այդ անձանց՝ըստ ցուցակի։

Անդրադառնալով ներկայացված նյութերին՝ նախագահող դատավոր Մխիթար Պապոյանը նշեց, որ դատարանը կպահանջի դատակոչի ցուցակը, մեղադրական եզրակացությունը, պաշտպանական կողմի միջնորդությունը՝ գրավ կիրառելու վերաբերյալ և Ռոբերտ Քոչարյանի խափանման միջոցի վերաբերյալ բոլոր որոշումները։

Նշենք, որ մեղադրող դատախազ Պետրոս Պետրոսյանը պահանջել էր, որ Վերաքննիչ քրեական դատարանն ուսումնասիրի ամբողջ քրեական գործը, ինչը դատարանի կողմից մերժվեց։

Հաջորդ դատական նիստը նշանակվել է դեկտեմբերի 6-ին՝ ժամը 12։00-ին։

Հիշեցնենք, որ Երեւանի ընդհանուր իրավասության դատարանը՝ Աննա Դանիբեկյանի նախագահությամբ, 2019 թվականի նոյեմբերի 7-ին մերժել է Ռոբերտ Քոչարյանի պաշտպանների միջնորդությունը՝ նրա նկատմամբ որպես խափանման միջոց գրավի կիրառումը թույլատրելու մասին՝ անփոփոխ թողնելով Ռոբերտ Քոչարյանի նկատմամբ որպես խափանման միջոց ընտրված կալանավորումը։

Դատարանի այս որոշման դեմ փաստաբան Հայկ Ալումյանը բողոք է ներկայացրել, ինչը վերաքննիչ քրեական դատարանում ստացվել է նոյեմբերի 12-ին, իսկ քրեական գործ՝ նոյեմբերի 20-ին եւ նույն օրը այն մակագրվել է դատավոր Մխիթար Պապոյանին։
Նշենք, որ դատավոր Մխիթար Պապոյանը մեծ հարգանք ունի փաստաբանների շրջանում՝ որպես պրոֆեսիոնալ դատավոր, սակայն նրա անունը ամիսներ առաջ շահարկվեց որպես իրավապաշտպան հանդես եկող Արտակ Գալստյանի կողմից, ով հայտնի է որպես «Վանոյի Արտակ»։

Ավելի վաղ տեղեկացրել ենք, որ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխելու եւ անձնական երաշխավորություն կիրառելու մասին դատավոր Դավիթ Գրիգորյանի մայիսի 18-ի որոշումից հետո Արտակ Գալստյանը, գրառում էր կատարել, թե այդ որոշումը Դավիթ Գրիգորյանի փոխարեն գրվել է դատավորներ Մխիթար Պապոյանի, Վազգեն Ռշտունու և Արշակ Վարդանյանի կողմից:
Մխիթար Պապոյանը հաղորդում էր ներկայացրել իրեն զրպարտելու վերաբերյալ, որի հիման վրա ԱԱԾ-ում հարուցվել է քրեական գործ՝ ՀՀ ՔՕ-ի 344-րդ հոդվածի 2-րդ մասով, այն է` դատավորին զրպարտելը, սակայն դատավորները չեն հրավիրվել հարցաքննության։

Նշենք, որ փաստաբան Հայկ Ալումյանը մեկ այլ բողոք էլ ներկայացրել է Երևան քաղաքի առաջին ատյանի ընդհանուր իրավասության դատարանի 20.09.2019թ. կայացված որոշման դեմ՝ պահանջելով բեկանել այն, փոփոխել` Ռոբերտ Սեդրակի Քոչարյանի նկատմամբ որպես խափանման միջոց ընտրված կալանքը վերացնել և նրան ազատ արձակել կալանքից , հակառակ դեպքում գրավի կիրառումը ճանաչել թույլատրելի և որոշում կայացնել Ռոբերտ

Քոչարյանին կալանքից գրավով ազատ արձակելու մասին , սահմանելով գրավի ողջամիտ չափ։ Այս բողոքը մակագրվել է դատավոր Տիգրան Սահակյանին։

Հեղինակ՝ Իզաբել Սահակյան

Աղբյուր` Փաստինֆո