Փաստ ինֆո

Երեւան քաղաքի ընդհանուր իրավասության դատարանը՝ դատավոր Մնացական Մարտիրոսյանը քննության առարկա չի դարձրել ԵԿՄ նախկին նախագահ, ԱԺ նախկին պատգամավոր Մանվել Գրիգորյանի նկատմամբ որպես խափանման միջոց ընտրված կալանավորումը գրավով փոխելու վերաբերյալ պաշտպանների միջնորդությունը։ Դատավոր Մարտիրոսյանը հայտարարեց, որ դատարանը իրավունքի չարաշահման տարրեր է տեսնում։ Նա ասաց, որ պաշտպանական կողմը նույն հիմքերով պարբերաբար միջնորդություն է ներկայացրել, որ պարբերաբար դատական նիստերը հետաձգվել են ամբաստանյալի վատառողջության պատճառով։

«Դատարանը արձանագրում է՝ գործի հանգամանքներից ելնելով, Գրիգորյանի վատառողջության պատճառով, տվյալ գործից ենթակա է անջատման Նազիկ Ամիրյանի վերաբերյալ մասը»,-հայտարարեց Մնացական Մարտիրոսյանը։

Մանվել Գրիգորյանի պաշտպաններից փաստաբան Լևոն Բաղդասարյանը առարկեց գրավի միջնորդությունը չքննարկելու դատարանի որոշման դեմ, ինչ վերաբերում է գործի առանձնացմանը, փաստաբանը հարցրեց՝ արդյո՞ք նախագահող դատավորը չունի ցանկություն լսելու դատավարական կողմերին։

Պաշտպանական կողմը ներկայացնող մյուս փաստաբանը հայտարարեց, որ հաջորդ դատական նիստին դատավորին ինքնաբացարկ է ներկայացնելու։

«Ընդհանրապես քրեական դատավարության միջազգային նորմ, նախադեպային իրավունք չեմ տեսնում, էս դատարանում կա մեկ իրավունք ՝ մեղադրյալ։ Ամեն կերպ պետք է Նազիկ Ամիրյանով ավարտել դատավարությունը, որ Մանվել Գրիգորյանի մասով լինի հաստատված հանգամանք»,-հայտարարեց փաստաբանը։

Հիշեցնենք, ըստ պաշտպանների, Մանվել Գրիգորյանի առողջական վիճակն անհամատեղելի է անազատության պայմանների հետ ։

Ինչպես տեղեկացրել ենք՝ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ: Նրան մեղադրանք է առաջադրվել 2018թ.–ի հունիսի 19-ին։

Մանվել Գրիգորյանի գործով դատական նիստը նշանակվեց դեկտեմբերի 17-ին, ժամը 14։00-ին, իսկ իսկ անջատված մասով՝ Նազիկ Ամիրյանի գործով քննությունը՝ դեկտեմբերի 3-ին, 14։00-ին։

Աղբյուր` Փաստինֆո