Փաստ ինֆո

«Ինչպես հասկանում եմ մեզ դատարանից մղում են դեպի դուրս, բառի բուն իմաստով մեր նկատմամբ բիրտ ուժ է կիրառվում»,-Մանվել Գրիգորյանի գործով հերթական դատական նիստից հետո հայտարարեց նրա պաշտպան, փաստաբան Արսեն Մկրտչյանը։

Փաստաբանը բացատրեց՝ նկատի չունի ֆիզիկական ուժի կիրառումը .«Մեզ ցույց են տալիս, որ երկրում իրավական լուծումները այլեւս փակված են եւ դրանք պետք է ման գալ կամ փողոցում կամ քաղաքական հարթակներում»,-հայտարարեց փաստաբանը։

Հիշեցնենք, այսօրվա դատական նիստին դատարանը, Մնացական Մարտիրոսյանի նախագահությամբ, որոշեց Մանվել Գրիգորյանի գործից առանձնացնել նրա կնոջ՝ Նազիկ Ամիրյանի գործը, իսկ Մանվել Գրիգորյանի խափանման միջոց կալանավորումը գրավով փոխարինելու պաշտպանական կողմի միջնորդությունը թողեց առանց քննության ՝հայտարարելով, որ իրավունքի չարաշահում է տեսնում։

«Մանվել Գրիգորյանի կալանքի 1/7-ը կամավոր կրում եմ իր հետ՝ համոզված լինելով, որ մեղադրանքի՝ առնվազն 90 տոկոսը հերյուրանք է , առայժմ դեռ կյանք ունեմ, ժամանակ ունեմ, ունեմ կեցվածք, որ նահանջելու տեղ չկա, մենք կընդունենք այս մարտահրավերը եւ կձեռնարկենք բոլոր քայլերը, որոնք հնարավոր է այս պարագայում քննարկել»,-ասաց փաստաբանը։ Նրա խոսքով, նորմալ պայմաններում միջնորդությունները քննվում են կողմերի կարծիքները հաշվի առնելով, իսկ տվյալ դեպքում, ըստ փաստաբանի, միջնորդությունը ընթերցվեց՝ ներկայացրած կողմի կարծիքը չհայտնած եւ դատարանը պաշտպանական կողմի միայն մեկ պաշտպանին լսելով, ասաց, որ միջնորդությունը ներկայացվել է նույն հիմքերով եւ որ պաշտպանական կողմը իրավունքի չարաշահում է թույլ տալիս։

«Գործ ունենք ծանր հիվանդ պաշտպանյալի հետ, եթե նախորդ անգամ մենք ասում էինք, որ նա 11 նիստի չի մասնակցել, հաջորդ անգամ ասում ենք՝ 12, հենց սա արդեն նոր հանգամանք է, որը դատարանն իրավունք չունի անտեսելու»։

Արսեն Մկրտչյանի խոսքով, պարզ ուրվագծվեց դատարանի միտումը. «Խնդիրը ոչ միայն իրավական է, գործը տանում է դեպի արագ հանգուցալուծում։ Մանվել Գրիգորյանը դատարանի կամ դատարանին հանձնարարություն տվողի, տվողների կողմից դիտարկվում է որպես նախկին օլիգարխ եւ սխալմամբ է դիտարկվում»։

Փաստաբանն ասաց, որ իր պաշտպանյալը ընկալվում է որպես նախկինների ներկայացուցիչ եւ ոչ Մանվել Գրիգորյանի համարձակությունն ու խիզախությունը խառնել են ունեցվածքի հետ։ «Մտածել են, որ եթե նախկինները համարձակ են իրենց պահում, ուրեմն շատ փող ունեն, բայց միայն փողը չէ ազատ խոսելու պատճառը»,եզրափակեց փաստաբանը։ Իսկ Մանվել Գրիգորյանի կինը՝ Նազիկ Ամիրյանը հայտարարեց. «Ֆեմիդան աչքերը կապած ավելի արդարադատ էր քան այս դատավորը, որը բաց աչքերով ոչ թե արդարադատություն է իրականացնում, այլ կամայական, ինքնանպատակ ինչ- որ գործողություններ »։

Աղբյուր` Փաստինֆո