Փաստ ինֆո

Տուժողները որևէ խափնման միջոց ընտրելու առումով շահագրգիռ կողմ չեն, քանի որ իրենք դատավարության ընթացքում ներկայացնում են մասնավոր շահը։ Այս մասին Վերաքննիչ քրեական դատարանում լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը՝ նշելով, որ դատական նիստը հետաձգելու մասին դատարանի որոշման հիմքերն իրենց չի բավարարում։ «Երբ խոսք է գնում որևէ մեկի խափանման միջոցի մասին, այստեղ չկա տուժողի մասնավոր շահ, այստեղ կա մի կողմից տվյալ անձի շահը՝ լինել ազատության մեջ և մյուս կողմից՝ հանրային շահ»,- ասաց Ալումյանը՝ հավելելով, որ հանրային շահը ներկայացնում է դատախազը։ Ըստ Ալումյանի՝ դատական նիստը հետաձգելու դատարանի որոշման մեջ հատուկ հետաձգման նպատակ չի եղել, սակայն վերջինս նշեց, որ կա դատարանի կաշկանդվածության նախանշան։

Ալումյանի խոսքով՝ դատարանը կաշկանդված է նրանով, որ կան անձինք, ովքեր իրենց համարում են տուժող և քննիչի կողմից ներառված են դատակոչի ցուցակում՝ իբրև տուժողներ։ «Դատարանը չէր ուզում այդ կողմի դժգոհության թիրախում հայտնվել։ Ինքներդ գիտեք, թե այդ կողմն ինչ ձևով է երբեմն իր դժգոհությունն արտահայտում»,- ասաց պաշտպանը։ Նա նաև նշեց, որ երբևէ չի փորձի նախապես գուշակել և հրապարակայնացնել, թե ինչ կանի Վերաքննիչ դատարանը՝ հաշվի առնելով այն ճնշումները, որը դատարանների վրա գոյություն ունի այսօր։ «Աննախադեպ, երևի 100-ամյակներով այսպիսի բան ոչ միայն Հայաստանում , այլ՝ գոնե այս մայրցամաքում չի եղել, գուցե Աֆրիկայում ինչ-որ դարաշրջանում եղել է »,-ասաց Ալումյանը։

Ինչ վերաբերում է քրեական գործով տուժող ճանաչելու վերաբերյալ վարույթն իրականացնող մարմնի որոշումները տրամադրելու մասին դատական նիստում իր հնչեցրած առաջարկին՝ Հայկ Ալումյանը նշեց. «Ես հո գիտեմ, որ նման որոշումներ չկան։ Դրա համար հետո դատախազները մի փոքր ուղղեցին իրենց՝ ասելով, որ այդ գործով չեն ճանաչվել, բայց սկզբնական գործով ճանաչված են »։ Ալումյանն ընդգծեց, որ սկզբնական գործում տուժողների թիվը եղել է ոչ թե 102, այլ՝ 200-ից ավել և այդ զտումը տեղի է ունեցել շատ տգեղ՝ ենթատեքստեր հաշվի առնելով։ Ալումյանի խոսքով՝ տուժողներին ներգրավվելը ոչ թե խոչընդոտման խնդիր կառաջացնի, այլ՝ ձգձգման։ «Պատկերացրեք՝ 102 մարդ գա այստեղ և ամեն մեկն իր կարծիքն ասի՝ պարոն Քոչարյանի նկատմամբ պետք է գրավ կիրառվի, թե ոչ այն դեպքում, երբ խափանման միջոցի առումով տուժող կողմը որևէ շահ ունենալ չի կարող »,- շեշտեց Ալումյանը։

Ավելի վաղ հայտնել ենք, որ Վերաքննիչ քրեական դատարանն այսօր հետաձգեց Ռոբերտ Քոչարյանի նկատմամբ գրավ կիրառելու գործով դատական նիստը. Նման գրավոր միջնորդությամբ հանդես էր եկել տուժողի ներկայացուցիչ Տիգրան Եգորյանը՝ նշելով, որ այլ դատական նիստի է մասնակցում։

Հիշեցնենք, որ Երեւանի ընդհանուր իրավասության դատարանը՝ Աննա Դանիբեկյանի նախագահությամբ, 2019 թվականի նոյեմբերի 7-ին մերժել է Ռոբերտ Քոչարյանի պաշտպանների միջնորդությունը՝ նրա նկատմամբ որպես խափանման միջոց գրավի կիրառումը թույլատրելու մասին՝ անփոփոխ թողնելով Ռոբերտ Քոչարյանի նկատմամբ որպես խափանման միջոց ընտրված կալանավորումը։ Դատարանի այս որոշման դեմ փաստաբան Հայկ Ալումյանը բողոք է ներկայացրել, ինչը վերաքննիչ քրեական դատարանում ստացվել է նոյեմբերի 12-ին, իսկ քրեական գործ՝ նոյեմբերի 20-ին եւ նույն օրը այն մակագրվել է դատավոր Մխիթար Պապոյանին։

Ավելի վաղ տեղեկացրել ենք, որ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխելու եւ անձնական երաշխավորություն կիրառելու մասին դատավոր Դավիթ Գրիգորյանի մայիսի 18-ի որոշումից հետո Արտակ Գալստյանը, գրառում էր կատարել, թե այդ որոշումը Դավիթ Գրիգորյանի փոխարեն գրվել է դատավորներ Մխիթար Պապոյանի, Վազգեն Ռշտունու և Արշակ Վարդանյանի կողմից: Մխիթար Պապոյանը հաղորդում էր ներկայացրել իրեն զրպարտելու վերաբերյալ, որի հիման վրա ԱԱԾ-ում հարուցվել է քրեական գործ՝ ՀՀ ՔՕ-ի 344-րդ հոդվածի 2-րդ մասով, այն է` դատավորին զրպարտելը, սակայն դատավորները չեն հրավիրվել հարցաքննության։ Նշենք, որ փաստաբան Հայկ Ալումյանը մեկ այլ բողոք էլ ներկայացրել է Երևան քաղաքի առաջին ատյանի ընդհանուր իրավասության դատարանի 20.09.2019թ. կայացված որոշման դեմ՝ պահանջելով բեկանել այն, փոփոխել` Ռոբերտ Սեդրակի Քոչարյանի նկատմամբ որպես խափանման միջոց ընտրված կալանքը վերացնել և նրան ազատ արձակել կալանքից , հակառակ դեպքում գրավի կիրառումը ճանաչել թույլատրելի և որոշում կայացնել Ռոբերտ Քոչարյանին կալանքից գրավով ազատ արձակելու մասին , սահմանելով գրավի ողջամիտ չափ։ Այս բողոքը մակագրվել է դատավոր Տիգրան Սահակյանին։

Հեղինակ՝ Իզաբել Սահակյան

Աղբյուր` Փաստինֆո