Փաստ ինֆո

Մեր հարցը հետևյալն է՝ դատախազությունը 2018 թվականի փետրվարի 23-ին հիմք ունե՞ր 0038 հրամանի հետևից գնալու և եթե ուներ հիմք՝ ինչու չի գնացել։ Դա է կանխակալ վերաբերմունքը և դա նկատի ունի Միհրան Պողոսյանը, երբ ասում է՝ քաղաքական պատվերի հետ գործ ունենք։ Ռոբերտ Քոչարյանի և մյուսների գործով դատական նիստի ժամանակ ասաց Ռոբերտ Քոչարյանի պաշտպան Հովհաննես Խուդոյանը։

Նա նկատեց՝ դատախազ Կարեն Բիշարյանին բացարկ հայտնելու միջնորդության մասով հնչեցին առարկություններ, որոնց հետ, ընդհանուր առմամբ համաձայն են, սակայն Հովհաննես Խուդոյանի պնդմամբ ճշմարտությունը մի փոքր ավելի է. «Պարոն Բիշարյանը նշեց, որ 0038 հրամանն իր ելույթի ժամանակ առկա չի եղել քրեական գործում և նշեց, որ նախկինում հրապարակված 0038 հրամանը բովանդակային առումով տարբերվում է, այսինքն` մասնակի է հրապարակվել և գործում ամբողջական տարբերակով հայտնվել է ավելի ուշ։ Սա ճիշտ փաստարկ է, բայց մեր նկատառումն այլ էր։ Երբ պարոն Բիշարյանը դեռևս այդ վարույթում էր և դեռևս տեղեկացված էր հրամանի գոյության մասին, ոչ բովանդակության մասին, տեսնում ենք, որ հենց նույն փետրվարի 23-ի ԱԺ-ում հնչեցրած ելույթների պահին և մինչ այդ դատախազական գործողություններ կատարելու ընթացքում որևէ գործողություն չի կատարվել հրամանը հայտնաբերելու ուղղությամբ։ Եթե 0038 հրամանի մասին հայտնի էր դեռևս 2011 թվականից, ապա ինչու՞ է ՀՔԾ-ն և Գլխավոր դատախազությունն այդ հրամանի հետևից գնում 2018 թվականի հունիս ամսին։ Սա է հարցադրումը»,-նշեց Հովհաննես Խուդոյանը։

Նա ընդգծեց՝ եթե դատախազն իր վարույթում տեսնում է, որ առկա են հանցագործության հատկանիշներ, անկախ հանգամանքից, քանի դեռ գործում է օրենքը, դատախազը գնում է օրենքով և այդ քրեական գործի հետքերով։

Հեղինակ՝ Հասմիկ Կոշկարյան

Աղբյուր` Փաստինֆո