Փաստ ինֆո

Դիլիջանի ուսումնական կենտրոնի տարածքում կախված վիճակում հայտնաբերված զինծառայողը Տաթև համայնքի Տանձատափ գյուղից էր: Նա բնավորությամբ համեստ, հանգիստ տղա էր։ Ամբողջ գյուղը սիրում էր նրան։ Բոլորիս համար զարմանալի էր, որ նման դեպք է տեղի ունեցել իր հետ։

Այս մասին այսօր «Փաստինֆո»-ի հետ զրույցում ասաց Տաթև համայնքի ղեկավար Մուրադ Սիմոնյանը։

Ինչպես արդեն տեղեկացրել ենք՝ այսօր` ժամը 9:00-ի սահմաններում, Դիլիջանի ուսումնական կենտրոնի տարածքում հայտնաբերվել է N զորամասի ժամկետային զինծառայող, շարքային Վահան Ռոբերտի Մուշեղյանի (ծնված 2000թ., 2019-1 զորակոչ, Սյունիքի ԶԿ) դին՝ ծառից կախված վիճակում:

Դեպքի առթիվ քննչական կոմիտեում հարուցվել է քրեական գործ՝ զինծառայողին ինքնասպանության հասցնելու դեպքի առթիվ։
Մ.Սիմոնյանը «Փաստինֆո»-ին պատմեց, որ դեպքից օրեր առաջ Վահանին տեսակցության էր գնացել նրա եղբայրը. «Կիրակի օրը եղբայրը գնացել էր տեսակցության, զանգել են ծնողներին, որ շատ լավ է, ծառայությունը՝ ընտիր, ղեկավարներն էլ գոհ են իրենից»։

Համայնքի ղեկավարը նշեց, որ Վահանը դպրոցն ավարտել էր գովասանագրերով, ընդունվել ԵՊՀ իրավագիտության ֆակուլտետ, ապա՝ անցել ծառայության։
«Հունվարին էր գնացել բանակ, այս հունվարին մեկ տարին կլրանար ինչ զինծառայող է։ Ուժեղ, աշխատող տղա էր»,-ասաց Սիմոնյանը։

Հեղինակ՝ Սոնա Գեւորգյան

Աղբյուր` Փաստինֆո