Փաստ ինֆո

Երևանի ընդհանուր իրավասության դատարանի դատավոր Աննա Դանիբեկյանին ուղիղ եթերում «վնգստացող դատավորների» մասին հարցեր ուղղած երիտասարդներ Նարեկ Մութաֆյանի և Սարգիս Օհանջանյանի կալանքի ժամկետը մեկ ամսով երկարաձգվել է։ «Փաստինֆո»-ի հետ զրույցում փաստաբան Արամ Վարդևանյանը նշեց, որ նախաքննական մարմնի՝ կալանավորումը ևս 2 ամսով երկարաձգելու միջնորդությունը դատարանն այսօր բավարարել է մասնակի՝ 1 ամիս ժամանակով։

«Այստեղ հարցեր կարող է առաջացնել այն, թե ինչպես են դատարաններն այդպես սինխրոնիզացված տպավորություն թողնող մոտեցում ցուցաբերում։ Ինչպես է ստացվում, որ երկու առանձին ժամերի դատական ակտեր, երկուսն էլ համանման՝ մասնակի բավարարելու մոտեցում»,-նշեց Արամ Վարդևանյանը՝ վերոնշյալը համարելով մտահոգիչ։

Սարգիս Օհանջանյանի հետ կապված դատական ակտի ուսումնասիրությունից Արամ Վարդևանյանն ընդգծում է ՝ այն իրենից ենթադրում է շաբլոնային, ստանդարտ ձևակերպումներ առանց որևէ կոնկրետ փաստական տվյալի վերլուծության, դրանց համադրման՝ կիրառվումէ կալանավորում. «Սարգիս Օհանջանյանն ունի ընտանիք, անչափահաս զավակ։ Այս պարագայում դատարանը նույնիսկ իր դատական ակտում չի անդրադարձել ընտանեկան դրության հարցին՝ գրավի թույլատրելիության հարցը որոշելու ժամանակ, մինչդեռ դա Վճռաբեկ դատարանի կայուն նախադեպային իրավունքի պահանջն է»,-նշեց Արամ Վարդևանյանը։

Նա նաև նկատեց, որ Սարգիս Օհանջանյանի վերաբերյալ դատական ակտում կրկին հղում է կատարվում Դավիթ Վարդանյանի նախադեպին, որը ոչ միայն հակասահմանադրական է, այլև նոյեմբերի 7-ին Վճռաբեկ դատարանն է հրաժարվել այդ նախադեպից. «Դժվարանում եմ բնութագրել այս իրավիճակը։ Մեզ մոտ միգուցե իրավական մշակույթի կարծրացած իրավիճակ է, որի հաղթահարման բանալին դժվար է հասկանալ։ Չէ որ մենք ունեցել ենք ՄԻԵԴ-ի հարյուրավոր նախադեպեր՝ կապված կալանքի շաբլոնային ձևակերպումների հետ, բայց խնդիրն ըստ էության շարունակում է մնալ»,-հավելեց Արամ Վարդևանյանը։
Հիշեցնենք, որ սեպտեմբերի 27-ի գիշերը երկու երիտասարդ ՝Նարեկ Մութաֆյանը և Սարգիս Օհանջանյանը, դատավոր Աննա Դանիբեկյանին զուգահեռ քայլելով նկարել և հարցրել են, թե արդյոք նա համարում է իրեն «դռների տակ վնգստացող դատավոր», ինչպես դատական իշխանության մասին խոսելիս արտահայտվել էր ՀՀ վարչապետ Նիկոլ Փաշինյանը։

Դեպքի առթիվ հարուցվել է քրեական գործ եւ ՀՀ Քննչական կոմիտեի ԵՔՔՎ Շենգավիթ վարչական շրջանների քննչական բաժնում քննվող քրեական գործով նշված երիտասարդներին մեղադրանք է առաջադրվել՝ ՀՀ քրեական օրենսգրքի 332-րդ հոդվածի 1-րդ մասի հատկանիշներով՝ արդարադատության իրականացմանը խոչընդոտելու համար։ Երեւանի ընդհանուր իրավասության դատարանը սեպտեմբերի 28-29-ին բավարարել է նրանց նկատմամբ որպես խափանման միջոց ընտրելու մասին քննիչի միջնորդությունները, որոնց դեմ ներկայացված վերաքննիչ բողոքները մերժվել են։

Աղբյուր` Փաստինֆո