Փաստ ինֆո

Քիչ առաջ դատարանը բավարարեց ԱԱԾ քննիչի միջնորդությունը՝ Կարեն Խաչատրյանի կալանքը եւս 2 ամսով երկարաձգելու մասին։

«Փաստինֆո»-ի փոխանցմամբ այս մասին դատարանի առջեւ տեղեկացրեց Կարեն խաչատրյանի շահերի ներկայացուցիչ , փաստաբան Ամրամ Մակինյանը՝ նշելով, որ որոշումն սպասելի էր։

«Գաղտնիք չէ, թե ինչ ճնշում կա այս քրեական գործի նկատմամբ, շատ մեծ համարձակություն է պետք այս գործով արդար որոշում կայացնելու համար»,-շեշտեց փաստաբանը։

Հիշեցնենք, որ Կարեն Խաչատրյանը կալանքի տակ է օգոստոսի 30-ից: Նա մեղադրվում է առանձնապես խոշոր չափի վատնում կատարելու մեջ: Նույն գործով մեղադրյալի կարգավիճակ ունի նաեւ ՊԵԿ նախկին նախագահ Գագիկ Խաչատրյանը. նա մեղադրվում է առանձնապես խոշոր չափի վատնման եւ պաշտոնեական դիրքի չարաշահման մեջ:

Ամրամ Մակինյանի խոսքով, վնասը՝ 200 միլիոն դրամից մի փոքր ավելի, որը առաջադրված է իր պաշտպանյալին, վաղուց ամբողջ ծավալով գտնվում է գլխավոր դատախազության դեպոզիտային հաշվին։ Փաստաբանը նաեւ հիմքեր չի տեսնում այն մտավախության համար, թե իր պաշտպանյալը կարող է խոչընդոտել գործի քննությանը կամ թաքնվել քննությունից։

«Հիմքերը, թե նա կխոչընդոտի քրեական գործին, ամբողջությամբ չեզոքացված են։ Հանրությունը գիտի, որ այս գործը քննվում է 2019թ.-ի փետրվարից։ Կարեն Խաչատրյանը գիտի այդ մասին։ Երբ առաջին անգամ ԱԱԾ-ն խուզարկություն է արել Կարեն Խաչատրյանի տանը, նա այնտեղ չի եղել, բայց իմանալով այդ մասին, տուն է եկել։ Այնպես որ՝ կխուսափի, կթաքվնի, անհիմն են»,-ասաց փաստաբանը։

Նա նաեւ նշեց, որ վերջին որոշմամբ, Երեւանի ընդհանուր իրավասության դատարանը նվազ էր գնահատել խոչընդոտելու հավանականությունը։ Այս որոշումը փաստաբանը նոր է ստացել եւ դեռ կծանոթանա։

«Լուրջ տարբերակված մոտեցում են ցույց տալիս այս գործին թե դատարանը, թե իրավապահ մարմինները։ Դուք ինքներդ տեղյակ եք, պետությանը պատճառված վնասը, երբ հատուցվում է, պետությունը շատ ավելի բարեհաճ է լինում»,-ընդգծեց Ամրամ Մակինյանը ու հարցրեց.«Ո՞րն է կարեւոր այս գործում, գուցե Կարեն Խաչատրյանի ազգանունը, ո՞րն է կարմիր թելը»։

Նա ասաց, որ պահին ն զերծ կմնա քաղաքական գնահատականներ տալուց, բայց եւս մեկ անգամ շեշտեց՝ արգելանքը երկար պահելու իմաստը հասկանալի չէ։

Ի դեպ, փաստաբանի մոտ հարցեր է առաջացրել նաեւ այն հանգամանքը, որ գործը նույն դատավորին է մակագրվել արդեն երրորդ անգամ։ Հարցի կապակցությամբ նա դիմել է դատարանի նախագահին, դեռ պատասխան չի ստացել։

Աղբյուր` Փաստինֆո