Փաստ ինֆո

Արթուր Վանեցյանի այդ հայտարարությունը համարում եմ տոտալ քաղաքական ։ Այս մասին լրագրողների հետ հանդիպման ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով ԱԱԾ և ՀՖՖ նախկին պետ Արթուր Վանեցյանի՝ Սորոսի գրասենյակի հետ կապված հայտարարությանը։

«Արթուր Վանեցյանը երկար տարիներ աշխատել է ԱԱԾ-ում։ Բաց հասարակությունների հիմնադրամների գրասենյակը Հայաստանում գործում է երկար տարիներ, այն ժամանակների երբ պարոն Վանեցյանը եղել է Էրեբունի համայնքում ԱԱԾ-ի պետ, երբ ԱԱԾ տնօրեն է նշանակվել, հետևաբար եթե նման մտահոգություններ կային, նա պետք է որոշակի գործողությունների իրականացներ»,-ասաց Էդմոն Մարուքյանը՝ նկատելով, որ պետք է դատական գործեր լինեին՝ որևէ կառույց փակելու կամ որևէ կառույցի գործունեություն քննարկման առարկա դարձնելու համար։

Էդմոն Մարուքյանը նշեց, որ այժմ Հայաստանը մի երկիր է, որտեղ երեք առանցքային պաշտոններում չկան նշանակված պաշտոնյաներ. «Հայաստանում չկա ՊՎԾ պետ, ԱԱԾ տնօրեն և ոստիկանապետ։ Այս անորոշության մեջ չեմ կարծում՝ ինչ-որ մեկը զբաղվելու է այդ հայտարարությամբ, և դրանով զբաղվելու կարիքը չեմ տեսնում է։ Փորձ է արվում տարատեսակ հայտարարություններով ուշադրություն գրավել, և Հայաստանի օրակարգը լցնել ինչ-որ թեմաներով, որոնք մեր երկրի զարգացման հետ կապ չունեն»,-հավելեց Էդմոն Մարուքյանը։

Հեղինակ՝ Հասմիկ Կոշկարյան

Աղբյուր` Փաստինֆո