Փաստ ինֆո

Փաստաբան Հովհաննես Խուդոյանը պատրաստակամ է իրավաբանական ծառայություն մատուցել փաստաբան Հովհաննես Չամսարյանի համակարգիչն առգրավող ԱԱԾ քննիչին։ Այս մասին փաստաբանը կատակով գրառել է Ֆեյսբուք սոցիալական ցանցում։

Հիշեցնենք, ԱԱԾ քննիչին չի հաջողվել փաստաբան Չամսարյանի գրասենյակից առգրավել 2 համակարգիչները։ Փաստաբանական համայնքին հաջողվել է հասնել նրան, որ այդ մասին արձանագրություն կազմվի։

ԱԱԾ քննիչը առավոտյան 11։00-ից գտնվում էր փաստաբանի գրասենյակում։ «ԱԱԾ-ում քննվում է մի քրեական գործ, որի շրջանակում ես հանդես եմ գալիս որպես ներկայացուցիչ իմ վստահորդի, որը գործով անցնում է որպես վկա։ Այդ գործի շրջանակներում դատարանը որոշում է կայացրել՝ առգրավել իմ համակարգիչները։ Անտեսվել է այն հանգամանքը, որ այնտեղ փաստաբանական գաղտնիք կազմող տեղեկություններ են պարունակվում, որոնք չեն կարող հայտնի դառնալ որեւէ անձի, բացառությամբ իմ վստահորդի եւ ինձ»,- «Փաստինֆո»-ին ասել էր Հովհաննես Չամսարյանը։

Փաստաբանների պալատի ներկայացուցիչները, այլ փաստաբանների հետ միասին այցելել էին փաստաբանի գրասենյակ՝ թույլ չտալու համակարգիչների առգրավումը: Տեղում են եղել նաեւ ՄԻՊ արագ արձագանքման խմբի ներկայացուցիչները։

Հիշեցնենք, որ «Փաստաբանության մասին» ՀՀ օրենքի 21-րդ հոդվածի 6-րդ և 7-րդ մասերի համաձայն՝փաստաբանի բնակարանը, տրանսպորտային միջոցը կամ գրասենյակը, ինչպես նաև փաստաբանական կազմակերպության գրասենյակը չեն կարող խուզարկվել փաստաբանական գործունեության հետ առնչվող հանգամանքները պարզելու կապակցությամբ: Չի թույլատրվում փաստաբանին խուզարկել իր մասնագիտական պարտականություններն անմիջականորեն կատարելիս: Փաստաբանի մոտ կամ փաստաբանական կազմակերպության գրասենյակում գտնվող իրավաբանական օգնությանը վերաբերող փաստաթղթերը և տեղեկատվական կրիչները (համակարգիչները, տեսաձայնագրող սարքերը, լազերային սկավառակները, տեսաժապավենները և այլն) անձեռնմխելի են, չեն կարող առգրավվել (վերցվել) և չեն կարող որպես ապացույց օգտագործվել:

Ստացվում է, որ փաստաբանական համայնքին հաջողվել է համոզել ԱԱԾ քննիչին՝ հետ կանգնել խնդրահարույց քայլից, մինչդեռ դատարանը տվել է նման գործողություն իրականացնելու թույլտվություն։

Աղբյուր` Փաստինֆո