Փաստ ինֆո

«Տասը տարին մեկ այս հարցը, փաստորեն, հարկ է լինելու օրակարգում դնել եւ քննարկման առարկա դարձնել, որպեսզի նմանատիպ իրավիճակներից կրկին խուսափենք։ Շատ վաղուց նմանատիպ իրավիճակների ականատես չէինք եղել, ցավոք էլի եղանք նման իրավիճակի ականատես, բայց կանխեցինք»,- «Փաստինֆո»-ի հետ զրույցում ասաց փաստաբան Երվանդ Վարոսյանը՝ անդրադառնալով փաստաբան Հովհաննես Չամսարյանի գրասենյակում ԱԱԾ քննիչների իրականացրած գործունեությանը։

Հիշեցնենք, ԱԱԾ-ում քննվող քրեական գործի շրջանակում ԱԱԾ քննիչը ցանկացել է առգրավել փաստաբան Հովհաննես Չամսարյանի գրասենյակի 2 համակարգիչները։

Երվանդ Վարոսյանի խոսքով, նման քայլերը եւ առհասարակ փաստաբանի մասնագիտական գործունեությանը խոչընդոտելն ու փաստաբանական գաղտնիքը վտանգի տակ դնելը առհասարակ կարող է փաստաբանությունը որպես արդարադատության մասնիկ վերացնել։ «Ամեն ինչ ուղղակի կդառնա ձեւական եւ անիմաստ։ Փաստաբանական գաղտնիքը օրենքով պահպանվող արժեք է եւ յուրաքանչյուր փաստաբան պարտավոր է այն պահպանել, դրա համար օրենքում համապատասխան երաշխիքները ներառված են՝ խուզարկության արգելքը, այնտեղ ուղիղ նշած է, որ անձեռնմխելի է նաեւ փաստաբանի համակարգիչը, այսինքն , այդ չափանիշները օրենքը իզուր չի նշել»,- «Փաստինֆո»-ին ասաց Երվանդ Վարոսյանը։

Նշենք, որ մեզ հետ զրույցում փաստաբան Հովհաննես Չամսարյանը իր գրասենյակում իրականացվող գործողությանը գնահատել էր որպես միջամտություն փաստաբանական գործունեությանը եւ քննչական մարմնի կողմից փորձ՝ փաստաբանի միջոցով տեղեկություններ կորզել։ Նա դատարանի որոշումը անհիմն ու անհասկանալի էր որակել։

Երվանդ Վարոսյանն ասաց, որ դատարանի պատճառաբանության հետ փաստաբանները համաձայն չեն եւ այդ որոշումն իր կարծիքով պետք է բողոքարկվի, մինչդեռ դատարանը այն մարմինն է, որը պետք է ֆիլտրի նման իրավիճակները եւ չպետք է թույլ տա, որ նման իրավիճակներ լինեն։ Նրա խոսքով, քննիչը, իհարկե, դժվարությամբ համաձայնեց համակարգիչներն առգրավելու մտքից հրաժարվել։ «Այդ ամենի վրա կարծում եմ իր ազդեցությունն ունեցավ այն, որ ինքը հասկացավ՝ չի հաջողվելու իրականացնել այն, ինչ պլանավորում էր»,-ասաց Վարոսյանը։

Նշենք, որ «Փաստաբանության մասին» ՀՀ օրենքի 21-րդ հոդվածի 6-րդ և 7-րդ մասերի համաձայն՝փաստաբանի բնակարանը, տրանսպորտային միջոցը կամ գրասենյակը, ինչպես նաև փաստաբանական կազմակերպության գրասենյակը չեն կարող խուզարկվել փաստաբանական գործունեության հետ առնչվող հանգամանքները պարզելու կապակցությամբ: Չի թույլատրվում փաստաբանին խուզարկել իր մասնագիտական պարտականություններն անմիջականորեն կատարելիս: Փաստաբանի մոտ կամ փաստաբանական կազմակերպության գրասենյակում գտնվող իրավաբանական օգնությանը վերաբերող փաստաթղթերը և տեղեկատվական կրիչները (համակարգիչները, տեսաձայնագրող սարքերը, լազերային սկավառակները, տեսաժապավենները և այլն) անձեռնմխելի են, չեն կարող առգրավվել (վերցվել) և չեն կարող որպես ապացույց օգտագործվել:

Աղբյուր` Փաստինֆո