Փաստ ինֆո

Հաջորդ տարի նվազագույն աշխատավարձը Հայաստանում կբարձրանա` 55 հազարից դառնալով 68 հազար դրամ։ Դրա արդյունքում ցածր աշխատավարձ ստացողները հունվարի 1-ից մի քանի հազարով ավել եկամուտ կստանա։ Բայց այն սոցիալական առումով մեծ բան չի փոխի։ Հատկապես, որ միանշանակ չի արտահայտվի այն ավելի քան 180 հազար աշխատող քաղաքացիների վրա, որոնք ընկնելու են այս փոփոխության տակ։ 

Աշխատավարձի նվազագույն շեմի բարձրացումը նրանց վրա տարբեր կերպ կարտահայտվի` մի դեպքում դա կարող է հանգեցնել աշխատավարձի 13 հազար, մեկ այլ դեպքում ընդամենը հազար դրամ բարձրացման։ Ու այդ պայմաններում սպասել, որ այս քայլով լուրջ սոցիալական խնդիր է լուծվելու, միամտություն է։
Ամեն դեպքում, նվազագույն աշխատավարձի ցանկացած բարձրացում ողջունելի է։ Ինչպիսին էլ այն լինի, որոշակի աջակցություն է սոցիալական անապահով հատվածին։ Որքան էլ այդ մի քանի հազար դրամով նրանց սոցիալական վիճակում մեծ փոփոխություններ անիմաստ է սպասել, այնուհանդերձ դա հնարավորություն է գոնե սպասվող գնաճային ճնշումներն ինչ-որ կերպ մեղմելու համար։

Առավել ևս, որ այդ ճնշումները հաջորդ տարի խորանալու են` կապված մի շարք արտաքին ու ներքին գործոնների հետ։
Հաջորդ տարվա սկզբից զգացնել կտան Եվրասիական տնտեսական տարածքից թելադրվող գնաճային ճնշումները։ Նախատեսված մաքսային դրույքաչափերի բարձրացմամբ պայմանավորված` սպասվում է շուրջ 700 անուն ապրանքների գների բարձրացում։ Ու դրանց մեջ քիչ չեն նաև առաջին անհրաժեշտության ապրանքները, այդ թվում` սննդամթերքը։

Երրորդ երկրներից ներմուծվող թռչնի, խոշոր եղջերավոր անասունի սառեցրած մսի ներմուծման մաքսատուրքը կբարձրանա 2,5-3, կաթնամթերքինը և կարագինը՝ 2, մարգարինինը՝ 12, բրնձինը՝ 3, արևածաղկի ձեթինը՝ 2 տոկոսով։ Կավելանան նաև դեղորայքի, շինանյութերի, գյուղատնտեսական պարագաների մաքսատուրքերը։ Մի բան, ինչը ենթադրում է նաև դրանց ներքին գների բարձրացում։

Չնայած այդ բոլոր փոփոխությունների ազդեցությունը Կենտրոնական բանկը գնաճի վրա գնահատել է ընդամենը 0,5 տոկոսի չափով, այնուհանդերձ հասկանալի է, որ այն տարբեր շուկաներում, տարբեր կերպ է արտահայտվելու։ Ինչպես սովորաբար լինում է, դա առավելապես երևալու է լայն սպառման ապրաքների դեպքում։

Բայց այնպես չէ, որ գնաճը գալու է միայն այս հատվածից։ Խոսքը ընդամենը լրացուցիչ ազդեցության մասին է։ Ու այդ ազդեցությունը բացառապես երրորդ երկրներից ներմուծված ապրանքների մաքսատուրքերի փոփոխություններով չի պայմանավորվելու։

Գրեթե կասկած չկա, որ հաջորդ տարի թանկանալու է նաև ռուսական գազը։ Ճիշտ է, դա տարվա սկզբից չի լինելու, այնուհանդերձ անպայման լինելու է։ Գազի ներքին սակագների բարձրացում է սպասվում հաջորդ տարվա ապրիլի 1-ից։ Իսկ դա արտահայտվելու է առաջին հերթին ապրանքների ու ծառայությունների գների բարձրացման տեսքով` հաշվի առնելով գազի ուղղակի ազդեցությունը տնտեսության բազմաթիվ ոլորտների վրա։

Գնաճային ճնշումներ կլինեն նաև ներքին միջավայրից։ Խոսքը այն ճնշումների մասին չէ, որոնք սովորաբար ամեն տարի էլ լինում են։ Խոսքը Հարկային օրենսգրքում կատարված փոփոխություններից թելադրված ճնշումների մասին է։ Սպասվում է մի շարք ենթաակցիզային ապրանքների գների բարձրացում, որոնց հետևանքները ևս «վայելելու» են սպառողները։

Այս պայմաններում, հասարակության սոցիալական վիճակի բարելավման առումով, դժվար է մեծ հույսեր կապել նվազագույն աշխատավարձի այն բարձրացման հետ, որը պիտի տեղի ունենա հաջորդ տարի։ Կասկած չկա, որ անգամ դրանից հետո տասնյակ հազարավոր աշխատող քաղաքացիներ շարունակելու են նույնքան վատ ապրել, ինչքան նախկինում էին ապրում։ Սպասվող թանկացումները կլանելու են այն լրացուցիչ եկամուտները, որոնք պիտի ստացվեն նվազագույն աշխատավարձի բարձրացման արդյունքում։

Աղբյուր` Փաստինֆո