Փաստ ինֆո

«2018թ-ի ապրիլին համընդհանուր բողոքի արդյունքում տեղի ունեցավ Թավշյա հեղափոխություն, որի գլխավոր, հիմնական նպատակներից մեկը պետք է լիներ Հայաստանում ժողովրդի արժանապատվության վերականգնումը։ Մենք վստահ ենք, որ առանց պետական ինստիտուտների նկատմամբ վստահության Հայաստանում հեղափոխությունն ավարտված լինել չի կարող։ Մենք շարունակում ենք ունենալ ուժային կառույցներ, որոնցից ժողովուրդը վախենում է»,-այս մասին այսօր Ազգային անվտանգության ծառայության դիմաց հայտարարեց «Ռեստարտ» ուսանողական-քաղաքացիական նախաձեռնության անդամ Դավիթ Պետրոսյանը։

Նա նշեց, որ եթե պետական ինստիտուտները չեն իրականացնում իրենց պարտավորվածությունները՝ պաշտպանելու սեփական քաղաքացիների անվտանգությունը և զբաղված են անգործությամբ, ապա այդ կերպ մասնակից են դառնում այն հանցագործություններին, որոնք տեղի են ունենում։

«Մենք ֆիքսում ենք, որ սոցիալական ցանցերում անպատժելիության մթնոլորտ է, որն արդեն դուրս է եկել ցանցից և մի շարք դեպքեր են տեղի ունեցել, երբ փողոցում ուղղակի մարդկանց հայհոյել են ցանկանալով սադրել, որպեսզի ծեծկրտուք տեղի ունենա, և ԱԱԾ-ի  նկատմամբ մինչև հիմա չկա վստահության մթնոլորտ։ Իսկ եթե այն չկա, ուրեմն Հայաստանում հեղափոխությունն ավարտված չէ»,-ասաց Պետրոսյանը։

«Ռեստարտի» անդամ Յուրի Ավագյանն էլ հավելեց, որ յուրաքանչյուր երկրում, երբ հեղափոխություն է տեղի ունենում կարևոր է նախկին ավտորիտար ռեժիմին ծառայած ուժային կառույցները նույնպես ենթարկվեն փոփոխության. «Եթե այդ կառույցները փոփոխության չեն ենթարկվում, նրանք գործում են հին փիլիսոփայությամբ։ Վառ օրինակն երևում է ոստիկանության համակարգում, երբ ծեծելու գործիքակազմը գոյություն չունի ու այդ մարդիկ չգիտեն ինչով զբաղվեն, մատնվել են անգործության, որովհետև իրենց ինստիտուցիոնալ դաստիարակությունն այնպես է, որ միայն այլ մեթոդներով են կարողանում գործեր բացահայտել»։

Ակցիայի մասնակիցները դատարկ թուղթ ԱԱԾ ընդունարան, որպեսզի ԱԱԾ-ն այդ թղթի վրա նշի այն վիդեոբլոգերների անունները, որոնք այսօր Հայաստանում գործում են ատելության խոսք ու անպատժելիություն խթանելու համար։

Հարցին, ո՞վ պետք է բարեփոխի իրավապահ համակարգը, Պետրոսյանը պատասխանեց. «Այս բոլոր պրոցեսները, բարեփոխումներն իրականացնելու պատասխանատվությունը ներկայիս ՀՀ Կառավարությանն է, բայց մինչ Կառավարությանը հարցադրումներ անելը, մենք հարցադրումներ ենք անելու առաջին հերթին տվյալ ոլորտի պատասխանատուներին։ Եթե նրանցից անհրաժեշտ պատասխաններ չստանանք, այսինքն` բավարար պատասխաններ չստանանք, տրամաբանական է, որ այդ հարցերը պետք է ուղղել նրանց, ովքեր ժողովրդի քվեն են ստացել ու փորձում են իրականացնել Հեղափոխության ժամանակ տրված խոստումները»։

Նա հայտնեց, որ այսուհետ այցելելու են բոլոր այն մարմիններին, որոնք պատասխանատու են Հայաստանում իրավապահ համակարգի պատշաճ գործունեության համար, ապա ավելացրեց, որ վաղը հանդիպելու են Ոստիկանապետի պաշտոնակատարի հետ և բոլոր հանդիպումներն առհասարակ լինելու են բաց. «Ցանկանում ենք, որ դրանք լուսաբանվեն լրատվականների կողմից։ Չի կարող լինել նոր Հայաստան հին իրավապահ համակարգի ներկայացուցիչներով»։

Հեղինակ՝ Սոնա Գեւորգյան

Աղբյուր` Փաստինֆո