Փաստ ինֆո

«Քաղաքացիական գիտակցություն» ՀԿ-ն բուհերում հայագիտական առարկաները ոչ պարտադիր դարձնելու նախագծի վերաբերյալ քննարկում է նախաձեռնել ՀՅԴ Հայաստանի Երիտասարդական միության և ԵՊՀ ուսանողների ներկայացուցիչների հետ։

ՀԿ-ի նախագահ Նարեկ Սամսոնյանից փորձենք ճշտել, թե ինչ նպատակ ունի քննարկումը, քանի որ թե՛ դաշնակցականները և թե՛ ԵՊՀ ուսանողներն իրենց տեսակետը հայտնել են և երկուսն էլ ժամանակավոր դադար են վերցրել։ Սամսոնյանը հայտնեց, որ քննարկումը կազմակերպել են, որպեսզի հասկանան հետագա հնարավոր ընթացքը, հետագա քայլերը, խնդիրները, նախաձեռնությունների հնարավոր միավորումը ։

«Օրինակ` մեր ուսանողական կառույցը միացել է ու շարժումն ինստիտուցիոնալացման փուլ է մտնում, որը կարծում եմ շատ կարևոր է ու անիմաստ չէ»,-«Փաստինֆո»-ի հետ զրույցում ասաց ՀԿ-ի նախագահը։

Նա հայտնեց, որ իրենց ուսանողական միությունը քննարկում է հնարավոր կոնսոլիդացիաները, և անհրաժեշտ են համարում, որ բոլոր նախաձեռնությունները միավորվեն, որպեսզի շարժումը մի կողմից վրա չթեքվի ու չսպառի ռեսուրսները։
«Իմ պատկերացմամբ, հիմա ուսանողության շրջանում տարբեր կառույցների համախմբման գործընթաց է մեկնարկում, որովհետև բոլորի խնդիրը մեկն է, բոլորն ունեն մեկ նպատակ։ Գլխով պատը չեն կոտրում, դրա համար պետք է մարտավարություն, զարգացած ու հստակ նպատակային ռազմավարություն և այդ ամենը պետք է քննարկել, հասկանալ։ Մենք վաղուց անցել ենք կոնգրեսի, տարբեր քաղաքական ձախողված ուժերի տրամաբանությունը, որ ովքեր մեզ հետ չեն, մեր դեմ են, մենք կռվում ենք փողոցում այնքան, մինչև մի հոգի մնա։ Հիմա ռազմավարություն, մարտավարություն քննարկելու ժամանակն է»,-ասաց Սամսոնյանը։
Խոսելով ՀՅԴ երիտասարդների նստացույցն ավարտելու մասին, Սամսոնյանն ասաց՝ կարծում է՝ ճիշտ են արել, որ «time out» են վերցրել. «Բայց դա միայն իրենք են, այնտեղ կան ուսանողական միություններ, կառույցներ, որոնք այդ շարժման մի մասն են կազմել ու կազմում»։
Նրա խոսքով, ժամանակն է ինստիտուցիոնալ մոտեցումներով քաղաքացիական շարժում ձևավորելու, քանի որ իշխանության նպատակը որևէ գնով նմանատիպ շարժումների առջև չընկրկելն է։

«Փաստինֆո»-ն զրուցեց նաև ՀՅԴ երիտասարդական միության վարչության անդամ Քրիստինե Վարդանյանը նշեց, որ նստացույցն ընդամենը գործիքներից մեկն էր, որն այնքանով, որքանով պետք է արդյունք տար, արդեն տվել է։

«Գործողությունները չենք դադարեցրել, պայքարը շարունակվում է։ Հիմա սպասում ենք Արայիկ Հարությունյանի հետ հանդիպմանը։ Հանդիպումից հետո հայտարարություն կլինի»,-ասաց ՀՅԴ երիտասարդական միության վարչության անդամը։

Հարցին, հանդիպմանն առաջ եք քաշելու Հարությունյանի հրաժարականի հարցը, թե՞ հնարավոր է այն այլևս օրակարգում չլինի, Վարդանյանը պատասխանեց.

«Պահանջը չի փոխվել, նույնն է, բայց նաև նշեցինք այն կետերը, որոնք մեզ համար խնդրահարույց են»։
Մեկ այլ հարցին, եթե քաղաքականության մեջ փոփոխություն լինի, բայց Հարությունյանը հրաժարական չտա, շարունակելու՞ եք պայքարը, դաշնակցական երիտասարդը պատասխանեց.

«Անպայման ադեկվատ կերպով կարձագանքենք ցանկացած քայլի նախարարության կողմից։ Պետք է նայել, թե ինչ քայլ է անում դիմացի կողմը, մեր քայլերը պայմանավորված են Ա. Հարությունյանի քայլերով»։

Հեղինակ՝ Սոնա Գեւորգյան

Աղբյուր` Փաստինֆո