Փաստ ինֆո

Հարց տալ չի կարելի, բա ի՞նչ անենք. դա արդեն խոսքի ազատության սահմանափակում է։ Այս մասին «Փաստինֆո»-ի հետ զրույցում ասաց բնապահպանական իրավունքի մասնագետ, իրավաբան Նազելի Վարդանյանը՝ անդրադառնալով «Լիդիան Արմեինա» ընկերության կողմից իր դեմ ներկայացված դատական հայցին։
Նազելի Վարդանյանը նշեց, որ չի ծանուցվել և առաջին անգամ «Փաստինֆո»-ից է լսում իր դեմ դատական հայցի մասին։

«Ես ոչ ծանուցում եմ ստացել, ոչ էլ։ Մի քանի ամիս առաջ իրենց հոդվածներից մեկում գրել էին, որ ակտիվիստների դեմ հայցեր էին պատրաստվում ներկայացնել, բայց ես ակտիվիստ չեմ, ես իրավաբան եմ։ Իմ անունը գրված է եղել»,- ասաց Վարդանյանը։

Նշենք, որ «Լիդիան Արմենիա» ընկերությունն ընդդեմ Նազելի Վարդանյանի դատական հայցը ներկայացրել էր՝ հիմնավորելով, որ իրենց գործարար և բարի համբավին վնաս է հասցվել Նազելի Վարդանյանի հետևյալ հայտարարության համար. «Ինչու Ջերմուկ հիմնադրամին գումար է փոխանցում 80 մլն, երբ որ Ջերմուկը ազդակիր համայնք չէ... ինչ է դա նշանակում.. դա կաշառքի մի ձև ա, ուրիշ տարբերակ չկա...»։

Հայտարարության վերաբերյալ Նազելի Վարդանյանն ասաց, որ դա հարցադրում է եղել։ Ըստ նրա՝ դա արդեն ազատ խոսքի սահմանափակում է։
Ավելի վաղ հայտնել ենք, որ «Լիդիան Արմենիա» ընկերությունը դատի է տվել փաստաբան Նազելի Վարդանյանին՝ պահանջելով հրապարակային հերքում և 1 մլն դրամ վնասի փոխհատուցում։ Հայցադիմումը վարույթ է ընդունվել Երևան քաղաքի ընդհանուր իրվասության դատարանի կողմից և մակագրվել է դատավոր Սարգիս Երիցյանին։ «Դատալեքս» դատական տեղեկատվական համակարգից տեղեկանում ենք, որ դատաքննությունը նշանակվել է դեկտեմբերի 12-ին՝ ժամը 12:00-ին։

Հեղինակ՝ Իզաբել Սահակյան

Աղբյուր` Փաստինֆո