Փաստ ինֆո

2019թ. հոկտեմբերի 31-ի դրությամբ՝ ՀՀ-ում կա շուրջ 600.000 ավտոտրասնպորտային միջոց, որից 400.000-ը Երևանում է շահագործվում, ինչը մեծ թիվ է։ Այս մասին ասուլիսի ժամանակ հայտարարել է ՀՀ ոստիկանության պետին կից հասարակական խորհրդի անդամ Սերգեյ Ղահրամանյանը։

«Դա ահռելի թիվ է, իսկ եթե հաշվի առնենք նաև, որ վերջին տարիներին Երևանում որևէ նոր փողոց չի կառուցվել` բացառությամբ Մոնթե Մելքոնյանի պողոտայից, իսկ դրա արդյունավետությունն այս պահին շատ ցածր է»,- ասաց Ղահրամանյանը։ Ըստ բանախոսի՝ 2008-2016 թթ. ընկած ժամանակահատվածում նկատվել է ՃՏՊ-ների հետևանքով մահացությունների թվի նվազում՝ 407-ից դարձել է 267, մինչդեռ վերջին երկու տարիներին նկատելի է մահացությունների թվի աճ, ինչը նաև Կառավարության կողմից ոչ պատշաճ ուշադրություն դարձնելու հետևանք է։ Փորձագետի խոսքով՝ Երևանում նվազել է ՃՏՊ-ներից զոհերի թիվը, քանի որ մեքենաների թիվը մեծ է, ինչն էլ խցանումների պատճառ է դառնում և քաղաքի կենտրոնում միջին արագությունը չի գերազանցում 30 կմ/ժ-ը։

Մահացության ելքով ավտովթարները հիմնականում, ըստ փորձագետի, լինում են խմածության, արագության գերազանցման և հանդիպակած դուրս գալու պատճառով։ Ղահրամանյանը նշեց, որ ՃՏՊ-ների պատճառ է նաև ՃՈ ոստիկանության ծառայողների թվաքանակի անփոփոխ թողնելը։ «Ավտոմեքենաների թիվն ավելանում է, բայց ոստիկանության կարգախմբերի թվաքանակը 2006-2007թ.-ից որևէ փոփոխության չի ենթարկվել։ Եթե այն ժամանակ մեկ կարգախումբը հսկում էր օրինակ՝ 1000 մեքենա, ապա այժմ այդ թիվը շուրջ 10000 է »,- ասաց Ղահրամանյանը։

Ինչ վերաբերում է հսկող սարքերին, փորձագետը նշեց, որ վարորդներն արդեն իմունիտետ ունեն և արագաչափ հսկող սարքերի մոտ կարող են դանդաղեցնել, այնուհետև՝ շարունակել արագ վարել։ Փորձագետը հայտնեց, որ տարեսկզբից մինչև հոկտեմբերի 31-ն ընկած ժամանակահատվածում գրանցվել է 63000 ԱՊՊԱ պատահար՝ նախորդ տարվա համեմատ 17%-ով ավել, այսինքն՝ օրական մոտ 200 դեպք, որի մեծ մասը Երևանում է։ Ղահրամանյանի խոսքով՝ խնդիր է նաև մտածելակերպը։ «Վարորդներն ասում՝ թող գլխիս մեկը կանգնի, որ ես խախտում չանեմ»,- ասաց փորձագետը։

Աղբյուր` Փաստինֆո