Փաստ ինֆո

«Մենք պատրաստ ենք մեր պահանջների բավարարման շուրջ ունենալ հանդիպում հրապարակային քննարկում պարոն Արայիկ Հարությունյանի հետ, խոսքը այստեղ հրապարակային հանդիպման մասին է»,-«Փաստինֆո»-ի փոխանցմամբ, հայտարարեց ԿԳՄՍ նախարարության շենքի առջեւ անժամկետ նստացույց իրականացնող ՀՅԴ-ական երիտասարդների նախաձեռնող խմբի անդամ Քրիստինե Վարդանյանը։
Նա ասաց, որ ամեն երկրորդ բառում ժողովրդավարությունից խոսող իշխանությունը պարտավոր է հանդիպում պահանջող քաղաքացիների հետ հանդիպել։ Նա ասաց, որ հանդիպման հրապարակային առաջարկը եղավ, եթե այն չընդունվի, իրենք կհայտնեն հետագա քայլերի մասին։
«Հրաժարականի պահանջը ուժի մեջ է, մինչեւ այլ հայտարարություն չլինի»,-հայտարարեց Վարդանյանը։ Իսկ Գոռ Սարգսյանը ասաց, որ երկուշաբթի օրվանից նստացույցը կդադարեցնեն եւ կանցնեն այլ գործողությունների, որոնցից առաջին քայլը կլինի նախարարի հետ ակնկալվող հանդիպումը։

Ներկայացնելով նոյեմբերի 6-ից մինչեւ օրս իրենց պայքարի ընթացքն ու արդյունքները՝ նա հայտարարեց, որ իրենց պայքարի ընթացքում փորձ է արվել իրենց պահանջները նեղացնել միայն հայագիտական առարկաների՝ բուհական ծրագրերում ոչ պարտադիր դարձնելու հարցի շրջանակում։ Քրիստինե Վարդանյանը պնդեց իրենց պահանջները։

«Պահանջը ձեւակերպվել է ՝ հաշվի առնելով ԿԳՄՍ նախարարության կողմից վերջին 1.5 տարվա ընթացքում վարվող քաղաքականությունը եւ այդ ֆոնին օրակարգ բերված կոսմետիկ փոփոխությունները, որոնք վերածվել են հայագիտական առարկաների դեմ պայքարին»,-հայտարարեց Քրիստինե Վարդանյանը։

Նա խոսեց «Հայոց եկեղեցու» պատմությունը դպրոցական ծրագրում որպես առանձին առարկա թողնելու, «Հայոց լեզու» եւ «Հայոց պատմություն» առարկաները բուհական ծրագրերում ոչ պարտադիր դարձնելու եւ նախարարության կողմից ֆինանսավորվող ծրագրերի մասին եւ նշեց, որ նոյեմբերի 4-ին ներկայացված իրենց պահանջները ձեւավորվել են այս ամենի հիման վրա։

Երիտասարդները խոսեցին այն որակումների ու գնահատակնների մասին, որ ԿԳՄՍ նախարարը տվել էր Դաշնակցության եւ պայքարի դուրս եկած երիտասարդների հասցեին։ Գոռ Սարգսյանը նկատեց, որ մինչեւ օրս նախարարը ներողություն չի խնդրել իր հայտարարությունների համար, պատմեց, որ արտերկրում ՀՅԴ երիտասարդական կառույցները դիմավորում են Արայիկ Հարությունյանին՝ բացատրելով, որ «ներսի եւ դրսի» Դաշնակցություն չկա։

Գոռ Սարգսյանը մեջբերեց Արայիկ Հարությունյանի՝ ՀՅԴ Բելգիայի երիտասարդական միության ներկայացուցիչների բողոքին ի պատասխան արված հայտարարության մասին, թե «Մարտի 1»-ը ձե՞ր իշխանության օրոք է եղել, եղե՛լ է, «Հոկտեմբերի 27»-ը եղել է ձեր իշխանության օրոք»։ Երիտասարդն ասաց, որ այդ ժամանակահատվածներում Դաշնակցությունը իշխանություն չի եղել։ Ապա երիտասարդներն արձանագրեցին, որ իրենց պայքարի արդյունքում վերոնշյալ խնդիրների վերաբերյալ քննարկում ծավալվեց, դասադուլի եւ գործադուլի դիմեցին ԵՊՀ ուսանողներն ու դասախոսները, բողոքի ձայն բարձրացրեցին մտավորականներ, հասարակական-քաղաքական գործիչներ։ Երիտասարդները խոսեցին նախարարի ու դասախոսների հանդիպման եւ չկայացած երկխոսության մասին, խորհրդարանական խմբակցություններին ուղղված իրենց դիմումների մասին, որոնց պատասխանները դեռ չեն ստացել։

Աղբյուր` Փաստինֆո