Փաստ ինֆո

«Այնպես չէ, որ մենք դուրս ենք եկել անելու քայլեր, որոնց պատճառով մեր երկրի ներդրումային գրավչությունը կպակասի։ Վստահ ենք, որ Ամուլսարի հանքարդյունաբերությունն աղետ է և անաչառ փորձաքննություն իրականացվելու դեպքում կպարզվի, որ Ամուլսարում ուղղակի չի կարելի հանք շահագործել»,- «Փաստինֆո»-ի հետ զրույցում ասաց Ջերմուկի բնակիչ Շիրակ Բունիաթյանը՝ անդրադառնալով ԱՄՆ դեսպան Լին Թրեյսիի «Սիվիլնեթին» տված հարցազրույցին, թե Ամուլսարի հարցով որոշումն օտարերկրացի ներդրողների ուշադրության կենտրոնում կլինի և Հայաստանի վերաբերյալ իրենց ներդրումային որոշումները կայացնելիս դա հաշվի կառնեն։

«Երեկ մամուլով տեսել եմ, որ ԱՄՆ դաշնային հետաքննությունների ծառայությունը հետաքննություն է սկսել «Լիդիան Արմենիա»-ի հետ կապված, չգիտեմ այդ ինֆորմացիան որքանով է հավաստի, բայց կարծում եմ այնպես չէ, որ ԱՄՆ-ն հստակ դիրքորոշում ունի այս հարցում»,-ասաց Բունիաթյանը
Նրա խոսքով, եթե անաչառ փորձաքննություն իրականացվի և պարզվի, որ Ամուլսարում ուղղակի չի կարելի հանք շահագործել, ապա ԱՄՆ-ն կամ մեկ այլ պետություն՝ տեսնելով ակնհայտ վտանգը, Հայաստանին ինչ-որ բաներ չեն ստիպի կամ այնպես չի լինի, որ Հայաստանը գրավիչ չհամարեն։
«Այս դեպքում իրենք էլ կհասկանան, որ Ամուլսարում հանքարդյունաբերությունը պետք է բացառել և նորմալ է, որ այն չի շահագործվում»,- ասաց Ջերմուկի բնակիչը։

Հեղինակ՝ Սոնա Գեւորգյան

Աղբյուր` Փաստինֆո