Փաստ ինֆո

Վարչապետի քաղաքացիների ընդունելության և դիմումների քննարկման վարչության պետ Ալեքսանդր Ղազարյանը տարիներ շարունակ խաբել է բնակիչներին,- պնդում են Կոնդի բնակիչները, որոնք այսօր բողոքի ակցիա էին իրականացնում՝ Կառավարության շենքի դիմաց։ Նշենք, որ նրանց էին միացել նաեւ Ֆիրդուսի, Եկմալյան փողոցի բնակիչները։

Ցուցարարների հետ զրուցելու համար դուրս եկավ նախ քաղաքացիների ընդունելության և դիմումների քննարկման վարչության պետ Ալեքսանդր Ղազարյանը, բայց հանդիպումը չափազանց լարված անցավ, քանի որ քաղաքացիների կարծիքով Ղազարյանը միտումնավոր նամակներին ընթացք չի տալիս և տարիներ շարունակ խաբել է իրենց։

Հակառակ քաղաքացիների պնդումներին, քաղաքացիների ընդունելության և դիմումների քննարկման վարչության պետն ասաց, թե բացառված է, որ կառավարությանն ուղղված դիմումները կորեն.

«Եթե վարչապետին դիմում են դատական հարցերով, դատարանների վճիռներից, քրեական գործերի հարուցումներից, ապա իհարկե ստացած պատասխանը չի գոհացնի, քանի որ վարչապետն ու նրա աշխատակազմը որևէ իրավասություն չունեն միջամտել նման գործընթացներին։ Նման պատասխաններ ստանալիս էլ քաղաքացիները սկսում են դժգոհել։ Չկա դիմում, որը կորում է կամ ընթացք չի տրվում, բոլոր դիմումներին պատասխան տրվում է, սակայն երբեմն այն կարող է նրանց չբավարարի կամ ինչ-ինչ պատճառներով տեղ չհասնեն»,-լրագրողների հետ ճեպազրույցում ասաց Ղազարյանը։

Ղազարյանի հետ զրույցից հետո քաղաքացիները պահանջեցին հանդիպում Էդուարդ Աղաջանյանի հետ։ Նրանց հետ զրուցելու եկավ Աղաջանյանի օգնական Հայկ Ավագյանը, ում Կոնդի բնակիչները ուրախությամբ դիմավորեցին։

«Մենք գալիս ենք մեր խնդրով հանձնաժողովի նիստին մասնակցելու, սակայն Ղազարյանն ու Ֆիդանյանը միտումնավոր թույլ չեն տալիս, որ մասնակցենք։ Իրենց 2-ին հաղորդում ենք տալիս հանցագործության մասին, դատախազություն էլ ենք տանում, և այն մարդիկ, ում մասին հաղորդում էինք ներկայացրել, զանգում են մեզ, ասում մեր վրա խի եք բողոքել...մենք քանի մեր տներում ենք այս հարցերին պետք է լուծում տրվի։ Մենք ուզում ենք այս հարցերը լուծվի, 6 ամսվա ընթացքում 2 նիստ է եղել, առաջինին կռվով ենք մտել։ Գնացինք վարչապետի առանձնատան մոտ, մեզ Ղազարյանն ասաց համբերեք, իմ թևերը կապած է, չեմ կարող, հիմա եկել ենք արձակենք, բմբուլներն էլ քամուն տանք... Ինձ հետ 148 հոգու ստորագրություն եմ բերել, մնացածինը դեռ չեմ բերել։ Գիտեք, Կոնդը 6000 բնակիչ ունի, չգանք ամբողջ Կոնդով իրենց վրայով անցնենք»,-ասաց Կոնդի բնակիչներից մեկը։

Ավագյանը ծանոթացավ բնակիչների խնդրին և խոստացավ քարտեզագրումների և մյուս պահանջների հետ կապված կոնկրետ պատասխան տալ երկուշաբթի օրը։

Աղբյուր` Փաստինֆո