Փաստ ինֆո

Նոյեմբերի 2-ին Սևան-Մարտունի ավտոճանապարհին 40-ամյա Գուրգեն Հակոբյանի սպանության գործով Երևան քաղաքի բնակիչ, 30-ամյա տղամարդ է կալանավորվել։ Այս մասին «Փաստինֆո»-ին հայտնեց ՔԿ դեպարտամենտի տեղեկատվական և հասարակայնության հետ կապերի բաժնի պետի պաշտոնակատար Նաիրա Հարությունյանը։ Նրա փոխանցմամբ՝ տղամարդուն մեղադրանք է առաջադրվել ՀՀ քրեական օրենսգրքի 38-104-րդ հոդվածի 1-ին մասի հատկանիշներով՝ սպանության օժանդակման համար։ 

Հիշեցնենք, որ նոյեմբերի 2-ին վաղ առավոտյան Սևան-Մարտունի ավտոճանապարհին հնչած կրակոցների հետեւանքով սպանվել է նույն մարզի բնակիչ, 40-ամյա Գուրգեն Հակոբյանը։ Չարագործները ճանապարհի մեջտեղում՝ շատերի կյանքի համար վտանգավոր եղանակով, ինքնաձիգից կրակահերթ են արձակել նրա «ՈՒԱԶ» մակնիշի ավտոմեքենայի դիմացի և ձախ կողային հատվածի ուղղությամբ, որի հետևանքով Գուրգեն Հակոբյանն ստացել է կյանքի հետ անհամատեղելի հրազենային բազմաթիվ մարմնական վնասվածքներ, իսկ ուղեւորը՝ ծնված 1962 ծնված տղամարդը վիրավորվել։

«ՈՒԱԶ» մակնիշի ավտոմեքենայի դիմացի և ձախ կողային հատվածում հայտնաբերվել է շուրջ 30 հրազենային գնդակային վնասվածք, իսկ ճանապարհի եզրից՝ 21 հատ պարկուճ: Ասել է թե՝ սպանությունը եղել է ծրագրված, թիրախային, ինչին չի խոչընդոտել նաեւ ավտոմեքենայում այլ անձի ներկայությունը։ Սա վկայում է, որ մարդասպանն ունեցել է անձնական թշնամանք տուժողի հետ, կամ էլ գործ ունենք պատվիրված սպանության հետ։

«Փաստինֆո»-ի տեղեկություններով՝ սպանվածի ընտանիքը արդեն տեւական ժամանակ է, ինչ լարված հարաբերություններ ունի Գեղարքունիքի նախկին փոխմարզպետ Անդրանիկ Հակոբյանի ընտանիքի հետ։ Իսկ վերջիններս էլ, ինչպես հայտնի է, ազգակցական կապեր ունեն քրեական հեղինակություն համարվող Նորատուսցի Ալիկի հետ։ Նշենք, որ Անդրանիկ Հակոբյանը 2017 թվականի հունվարի 7-ին սպանված 29-ամյա Հայկ Հակոբյանի հայրն է, իսկ փոխմարզպետի որդու սպանության մեջ մեղադրվող Մեխակ Հարությունյանը՝ նոյեմբերի 2-ին սպանված Գուրգեն Հակոբյանի զարմիկը։

Հեղինակ՝ Իզաբել Սահակյան

Աղբյուր` Փաստինֆո