Փաստ ինֆո

Կառավարությունն այսօրվա նիստում որոշում կայացրեց Ադրբեջանից բռնագաղթած անօթևան ընտանիքներին բնակարանով ապահովելու նպատակով 2019 թվականի պետբյուջեի պահուստային ֆոնդից բնակարանների գնման վկայագրեր տրամադրել։

ՀՀ տարածքային կառավարման և ենթակառուցվածքների փոխնախարար Բագրատ Բադալյանը հայտնեց, որ 2013 թվականին իրականացված հաշվառման տվյալների համաձայն՝ առաջնահերթ կարիքավոր են համարվում 895 ընտանիք,որոնցից 641-ը՝ Երևանում և 254-ը՝ մարզերում։ Փոխնախարարը նկատեց, որ նպատակահարմար է փախստականների բնակարանային ապահովության խնդիրը լուծել ոչ թե մեկ ընդհանուր ծրագրի շրջանակներում, այլ այն տարանջատել ըստ առաջնահերթության ՝ մշակելով առանձին համապատասխանմ ենթածրագրեր. «1988-ից 1992 թվականներին Ադրբեջանի Հանրապետությունից բռնի տեղահանված ընտանիքների բնակարանային խնդիրը լուծելու համար նախատեսվում է առաջին փուլում առաջնորդվել ըստ Երևան քաղաքի վարչական շրջանների ինչպես նաև ընդգրկել մասնավոր սեփականություն հանդիսացող, սակայն Ադրբեջանից բռնագաղթած ընտանիքների կողմից զբաղեցրած կացարանները։ Մասնավորապես առաջին փուլում մասնավոր սեփականություն հանդիսացող կացարանների՝ Սեբաստիա հյուրանոց, Նաիրի հյուրանոց ընդգրկումը պայմանավորված է ընտանիքների անօթևանության մեջ հայտնվելու ամենօրյա վտանգով, քանի որ այդ ժամանակավոր կացարանների սեփականատերերի կողմից ազատման պահանջ ներկայացվելու դեպքում այդ ընտանիքների պաշտպանվածության իրավական արդյունավետ մեխանիզմները բացակայում են»,-ասաց Բագրատ Բադալյանը։

Վերջինս, մանրամասնելով բնակարանների ձեռքբերման ընթացակարգը, նշեց, որ վկայագրերի տրամադրումը կիրականացվի Ադրբեջանից բռնագաղթած ընտանիքների հետ պայմանագրեր կնքելուց հետո։ Վկայագրերի միջոցով բնակարանի ձեռքբերման ժամկետը սահմանվել է մեկ տարի՝ առանց ժամկետի երկարացման հնարավորության։

ՀՀ փոխվարչապետ Տիգրան Ավինյանը նկատեց, որ այս պարտավորությունը պետությունը ստանձնել է դեռևս շատ վաղուց և 10-11 տարի այս ուղղությամբ որևէ բան չի իրականացրել. «Ես նույնպես հանդիպել եմ այդ ընտանիքների ներկայացուցիչների հետ և բավականին ծանր պայմաններում են նրանք ապրում։ Կարծում եմ փուլ առ փուլ այս բոլոր խնդիրները և հին պարտքերը պետք է մարենք»,-հավելեց փոխվարչապետը։

Վարչապետի աշխատակազմի ղեկավար Էդուարդ Աղաջանյանն էլ փորձեց հստակեցնել, թե այս փուլում քանի ընտանիքի հարց է լուծվում և որքան գումար է անհրաժեշտ, որին ի պատասխան, փոխնախարարն ասաց. «Լուծվում է 112 ընտանիքի հարց։ Անհրաժեշտ է շուրջ 1.5 մլրդ դրամ»։

Հեղինակ՝ Հասմիկ Կոշկարյան

Աղբյուր` Փաստինֆո