Փաստ ինֆո

«Ատելությունը ինչ-որ մեկը պետք է ներմուծի՝ իր ստերով, հասարակությանը մանիպուլյացիայի ենթարկելով։ Հայտնի մեթոդներ են՝ հասցնում ես էքստազային վիճակի եւ մարդը դառնում է զոմբի ու պատրաստ է ամեն ինչ անել։ Հիմա, իրենք 20 տարի սուտ են խոսել, կոնկրետ անձերի հետ կապված անընդհատ մարդկանց խաբել են»,-«Փաստինֆո»-ին ասաց «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով Միլանի հայկական եկեղեցում վարչապետ Նիկոլ Փաշինյանի ՝ հայ համայնքի հետ հանդիպմանը գրանցված միջադեպին, երբ ՀՀ քաղաքացին վարչապետից պահանջեց հրաժարական տալ։

Գառնիկ Իսագուլյանը ՀՀ 2-րդ նախագահ Ռոբերտ Քոչարյանի օրինակը նշեց։ «Երկրորդ նախագահի դեպքում ասել են, որ նա միլիարդներ է թալանել, հանք ունի, բանկ ունի, բայց հիմա պարզվում է, որ դրանցից ոչ մեկը չկա։ Արդեն տարի ու կես է՝ աշխարհի բոլոր միջոցներն օգտագործում են, բայց ոչինչ չեն կարողանում ապացուցել, միայն մարդկանց ասում են՝ արի, ցուցմունք տուր։ Սա նշանակում է, որ իրենք են այդ ատելությունը սերմանել ժողովրդի մեջ»,-ասաց նա։
Ըստ Իսագուլյանի, Նիկոլ Փաշինյանը շատ լավ գիտի, որ եթե հիմա այդ ատելությունից հրաժարվի, կստացվի, որ այդ ամենը դատարկ խոսքեր են եղել՝ հիմնված ստի վրա։

«Երբ ինքն իրեն Քրիստոսի հետ համեմատում է, սա արդեն ամեն ինչ ցույց է տալիս։ Դա հիվանդագին մոտեցում է խնդիրներին։ Մենք աղոթենք Աստծուն, Քրիստոսին, որ այդ մարդու երեւակայական աշխարհին թողություն տա եւ բերի գիտակցական դաշտ»,-նկատեց Իսագուլյանը։

Հիշեցնենք, Միլանի հայկական եկեղեցում ՀՀ վարչապետը խոսելով կոռուպցիայի դեմ պայքարից ու ատելության մթնոլորտի խնդրից, որը սերմանելու մեջ իրեն մեղադրեցին, հայտարարեց. «Մենք քարոզում ենք սեր, եկեղեցում ենք մենք գտնվում, ես ինքս, ինչպես մեր Տեր Հիսուս Քրիստոսն էր սեր քարոզում, բայց երբ որ եկավ ժամանակը, նա մտավ տաճարի տարածք և շուռ տվեց սեղանները՝ ասելով, որ այս սրբության տաճարը դուք դարձրել եք առևտրի և դալալության միջավայր: Նույնիսկ Հիսուս Քրիստոսը մտավ տաճար և շուռ տվեց էն սեղանները, որտեղ պղծվում էին սրբությունները»:

Ի դեպ, Գառնիկ Իսագուլյանը ուշագրավ է համարում Փաշինյանի արձագանքի տարբերությունը իր հրաժարականը պահանջող հայ կնոջն ու բլոգեր ներկայացած Ադրբեջանցուն։

«Փաշինյանի եւ հայ հասարակության համար ամենամեծ ողբերգությունն այն է, թե նա ինչ մոտեցում ցուցաբերեց Ադրբեջանի բլոգերի նկատմամբ եւ ինչ վերաբերմունք՝ հայ կնոջ նկատմամբ։ Դա էլ է զարմանալի, չէ՞, ադրբեջանցու հետ փորձում էր կիրթ լինել»,- կարծում է Գառնիկ Իսագուլյանը ։

Բլոգեր ներկայացած ադրբեջանցին, որը ինչպես պարզվեց՝ ոստիկանության կամ հատուկ ծառայությունների աշխատակից էր, ՀՀ վարչապետին ագրեսիվ տոնայնությամբ հարցեր ուղղեց, իսկ Փաշինյանը հորդորեց անվտանգության աշխատակիցներին թողնել նրան, որ խոսի։

Աղբյուր` Փաստինֆո