Փաստ ինֆո

Վերաքննիչ դատարանն իսկապես իրավական և ֆորմալ առումով դժվար կացության մեջ էր. արձանագրել է, որ բողոքում նշված հանգամանքները ճիշտ են, բայց ազատություն տալ չի կարող, քանի որ այն արդեն ունեմ։ «Փաստինֆո»-ի հետ զրույցում ասաց Աժ աշխատակազմի ղեկավարի նախկին տեղակալ Արսեն Բաբայանը՝ մեկնաբանելով Վերաքննիչ քրեական դատարանի այսօրվա որոշումը։

Հիշեցնենք, որ այսօր հրապարակված որոշմամբ մերժվել է Ա.Բաբայանի նկատմամբ որպես խափանման միջոց կալանավորումը կիրառելու Երևանի ընդհանուր իրավասության դատարանի որոշման դեմ բողոքը։ 

Ա.Բաբայանը նշեց, որ բողոքը ներկայացվել էր այն ժամանակ, երբ ինքը դեռ կալանքի տակ էր։ «Վերաքննիչ դատարանին խնդրել էինք վերացնել Երևանի ընդհանուր իրավասության դատարանի՝ կալանավորման մասին որոշումը և ինձ ազատ արձակի»,- նշեց Բաբայանը՝ հավելելով, որ Վերաքննիչ դատարանում քննության ընթացքում ինքն արդեն ազատության մեջ էր, այսինքն՝ Դատախազությունն արդեն վերացրել էր կալանքի որոշումը, հետևաբար՝ Վերաքննիչ դատարանը պետք է որոշեր՝ ինչը վերացներ։ «Մեր պահանջը բավարարելու դեպքում կստացվեր, որ ինքը բավարարում է մի բան, որն այլևս գոյություն չունի։ Քաղաքական իշխանությունը կանխատեսելով, թե ինչ կարող է տեղի ունենալ Վերաքննիչ դատարանում, եթե ես լինեմ կալանքի տակ, նախաձեռնեց իշխանական պատգամավորների կողմից ինձ հնարավորինս արագ ազատ արձակելու եղանակ»,- ընդգծեց Արսեն Բաբայանը։ Այն է՝ պատգամավոր Սիսակ Գաբրիելյանի նոյեմբերի 12-ին ներկայացրած միջնորդության հիման վրա կիրառվեց այլ խափանման միջոց, որը կապ չուներ ազատությունից զրկելու հետ, մինչդեռ՝ մինչ այդ միջնորդություն էր ներկայացրել նաև Արցախի ՄԻՊ Արտակ Բեգլարյանը, որը, չգիտես ինչու, չքննարկվեց։

Ըստ Բաբայանի՝ Վերաքննիչ դատարանը արձանագրել է, որ բողոքում մեր կողմից նշված փաստարկները ճիշտ են, սակայն ֆորմալ առումով չի կարող բավարարել մի բան, որն այլևս գոյություն չունի։ «Այսինքն՝ ինձ չի կարող տալ ազատություն, քանի որ ես արդեն ունեմ այդ ազատությունը։ Իրավական առումով բավականին հետաքրքիր գործ է։ Կարծում եմ՝ կարող է դառնալ շատ լավ նախադեպային որոշում»,- ասաց Բաբայանը։ Նշենք, որ Վերաքննիչ դատարանը թեև մերժել է Արսեն Բաբայանի պաշտպանական թիմի բողոքը, բայց արձանագրել է, որ խախտվել են նրա իրավունքները։
Հարցին, թե արդյոք վերաքննիչ դատարանի որոշումը կբողոքարկվի վճռաբեկ դատարանի, քանի որ փաստացի մերժվել է բողոքը՝ Արսեն Բաբայանը նշեց, որ հարցին կանդրադառնան վերաքննիչ քրեական դատարանի որոշումն ստանալուց հետո, երբ հնարավորություն կունենան ծանոթանալ դրան ամբողջությամբ՝ հավելելով, որ այս պահին իրենց բողոքները բավարարված են։

«Եթե ես հենց հիմա նստած լինեի «Վարդաշեն» ՔԿՀ-ում, ապա միանշանակ Վերաքննիչ դատարանը կբավարարեր և անմիջապես ազատություն կտար ինձ»,- նշեց Բաբայանը։

«Փաստինֆո»-ն տեղեկացրել է, որ այսօր ՀՀ Վերաքննիչ քրեական դատարանը մերժել է Արսեն Բաբայանի պաշտպանական թիմի ներկայացրած բողոքը՝ կալանավորումը որպես խափանման միջոց ընտրելու մասին Երևանի ընդհանուր իրավասության դատարանի որոշման դեմ՝ արձանագրելով, որ Արսեն Բաբայանի իրավունքները խախտվել են։ Ավելի վաղ հայտնել ենք, որ Արսեն Բաբայանը նոյեմբերի 12-ին ազատ է արձակվել «Վարդաշեն» ՔԿՀ-ից. Դատախազությունը նրա նկատմամբ որպես խափանման միջոց է կիրառել անձնական երաշխավորությունը։

Հիշեցնենք, որ նա ձերբակալվել է հոկտեմբերի 21-ին պաշտոնեական կեղծիք կատարելու կասկածանքով։ Նույն օրը փաստաբանները դատարան են մուտքագրել բողոքը՝ ձերբակալելու որոշման դեմ, սակայն դատարանը ձգձգեց բողոքի քննարկումը։ Հոկտեմբերի 22-ի երեկոյան՝ Արսեն Բաբայանին մեղադրանք է առաջադրվել ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով նախատեսված հանցավոր արարքների՝ իշխանության յուրացմանը օժանդակելու և պաշտոնեական կեղծիք կատարելու հատկանիշներով։ Հոկտեմբերի 24-ին Երևանի ընդհանուր իրավասության դատարանը ոչ իրավաչափ համարեց Արսեն Բաբայանին ձերբակալությունը, սակայն բավարարեց նրա նկատմամբ որպես խափանման միջոց կալանավորումն ընտրելու մասին քննիչի միջնորդությունը։ Ընդ որում՝ ձերբակալությունը ոչ իրավաչափ ճանաչելու մասին դատարանի որոշումը դատախազության կողմից չի բողոքարկվել։

Հոկտեմբերի 29-ին իրավապաշտպան, «Հայաստանի Հելսինկյան կոմիտե» ՀԿ նախագահ Ավետիք Իշխանյանը և Արցախի Հանրապետության Մարդու իրավունքների պաշտպան Արտակ Բեգլարյանը (անձնական կարգավիճակով) գրավոր դիմել են քրեական հետապնդման մարմիններին՝ պատրաստակամություն հայտնելով իրենց խոսքով և վճարվող գումարով երաշխավորելու Արսեն Բաբայանի պատշաճ վարքագիծը քրեական գործի քննության ընթացքում։

Սակայն դատախազությունը հայտարարեց, թե երաշխավորություն է ներկայացրել իշխող ուժի պատգամավոր, սորոսական թեւի ներկայացուցիչ Սիսակ Գաբրիելյանը։ Արցախի ՄԻՊ-ի երաշխավորության քննարկման արդյունքների մասին տեղեկություն չկա։

Հեղինակ՝ Իզաբել Սահակյան

Աղբյուր` Փաստինֆո