Փաստ ինֆո

ՀՀ վերաքննիչ քրեական դատարանը՝ դատավոր Արսեն Նիկողոսյանի նախագահությամբ, արձանագրել է Աժ աշխատակազմի նախկին ղեկավարի տեղակալ Արսեն Բաբայանի իրավունքների խախտումները, բայց ֆորմալ առումով մերժել նրա նկատմամբ կալանավորումը որպես խափանման միջոց ընտրելու մասին Երևանի ընդհանուր իրավասության դատարանի որոշման դեմ փաստաբանների բողոքը։ Այս մասին դատարանում հայտարարել է Արսեն Բաբայանի փաստաբան Երվանդ Վարոսյանը։ Երվանդ Վարոսյանի խոսքով՝ դատարանը մերժել է այն պատճառաբանությամբ, որ Արսեն Բաբայանն արդեն ազատության մեջ է գտնվում և նրա խափանման միջոցը փոփոխված է։

«Միևնույն ժամանակ դատարանն արձանագրել է իրավունքների խախտման բոլոր փաստերը, որոնց մասին մենք բարձրաձայնել ենք։ Այսինքն՝ ըստ էության գնահատական է տվել սկսած հիմնավոր կասկածից, հիմքերից մինչև ձերբակալման օրինաչափություն, համաներման չկիրառում և այլն։ Գրեթե ամբողջ ծավալով, ինչ ծավալով մենք բողոք ենք ներկայացրել, Վերաքննիչ դատարանը գտել է, որ մեր բողոքը հիմնավորված է և արձանագրել է, որ Արսեն Բաբայանի իրավունքները խախտվել են»,- ասաց Վարոսյանը՝ հավելելով, որ Վերաքննիչ դատարանին ուղղված պահանջն օրենքով կարող է լինել անձին ազատ արձակելը, իսկ փաստացի Արսեն Բաբայանը ազատ արձակված է, դատարանը մերժելու որոշում է կայացրել։ Երվանդ Վարոսյանն ընդգծեց, որ, նկատի ունենալով այն հանգամանքը, որ իրավունքների խախտման փաստն ամբողջ ծավալով արձանագրված է, որոշմանն ամբողջությամբ ծանոթանալուց հետո պարզ կլինի՝ որոշումը բավարարում է, թե ոչ։

«Փաստինֆո»-ի հարցին, թե արդյո՞ք պատրաստվում են բողոքարկել նաև Արսեն Բաբայանին մեղադրանք առաջադրելու որոշումը՝ Երվանդ Վարոսյանը պատասխանեց. «Տակտիկական իրավիճակից ելնելով։ Չի բացառվում, բայց ես առհասարակ դրա կողմնակիցը չեմ»։
Արսեն Բաբայանն էլ նշեց՝ այս որոշումը կանխատեսելի էր։ «Մենք պաշտպանական թիմի հետ մտածել էինք, որովհետև այդտեղ կա նաև իրավաբանական խնդիր»,- ասաց Բաբայանը։ Ըստ Բաբայանի՝ կարևոր է, որ արձանագրվեն իր իրավունքների խախտումները։ «Փաստինֆո»-ն ավելի վաղ հայտնել էր, որ Արսեն Բաբայանը նոյեմբերի 12-ին ազատ է արձակվել «Վարդաշեն» ՔԿՀ-ից. Դատախազությունը նրա նկատմամբ որպես խափանման միջոց է կիրառել անձնական երաշխավորությունը։

Հիշեցնենք, որ նա ձերբակալվել է հոկտեմբերի 21-ին պաշտոնեական կեղծիք կատարելու կասկածանքով։ Նույն օրը փաստաբանները դատարան են մուտքագրել բողոքը՝ ձերբակալելու որոշման դեմ, սակայն դատարանը ձգձգեց բողոքի քննարկումը։ Հոկտեմբերի 22-ի երեկոյան՝ Արսեն Բաբայանին մեղադրանք է առաջադրվել ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով նախատեսված հանցավոր արարքների՝ իշխանության յուրացմանը օժանդակելու և պաշտոնեական կեղծիք կատարելու հատկանիշներով։ Հոկտեմբերի 24-ին Երևանի ընդհանուր իրավասության դատարանը ոչ իրավաչափ համարեց Արսեն Բաբայանին ձերբակալությունը, սակայն բավարարեց նրա նկատմամբ որպես խափանման միջոց կալանավորումն ընտրելու մասին քննիչի միջնորդությունը։ Ընդ որում՝ ձերբակալությունը ոչ իրավաչափ ճանաչելու մասին դատարանի որոշումը դատախազության կողմից չի բողոքարկվել։

Հոկտեմբերի 29-ին իրավապաշտպան, «Հայաստանի Հելսինկյան կոմիտե» ՀԿ նախագահ Ավետիք Իշխանյանը և Արցախի Հանրապետության Մարդու իրավունքների պաշտպան Արտակ Բեգլարյանը (անձնական կարգավիճակով) գրավոր դիմել են քրեական հետապնդման մարմիններին՝ պատրաստակամություն հայտնելով իրենց խոսքով և վճարվող գումարով երաշխավորելու Արսեն Բաբայանի պատշաճ վարքագիծը քրեական գործի քննության ընթացքում։ Սակայն դատախազությունը հայտարարեց, թե երաշխավորություն է ներկայացրել իշխող ուժի պատգամավոր, սորոսական թեւի ներկայացուցիչ Սիսակ Գաբրիելյանը։ Արցախի ՄԻՊ-ի երաշխավորության քննարկման արդյունքների մասին տեղեկություն չկա։

Հեղինակ՝ Իզաբել Սահակյան

Աղբյուր` Փաստինֆո