Փաստ ինֆո

Քիչ է՝ ասել շատ տպավորված եմ անցյալ ամիս այսերկրային կյանքից հեռացած տաղանդավոր քանդակագործ Արտո Չաքմաքչյանի հիշատակի առիթով Վահան Արծրունու նախաձեռնած համերգից, որը երեկ Կամերային երաժշտության տունը լցրել էր Կոմիտասի, Արտոյի ու Արծրունու ոգեղենությամբ: Արտոյի հիշատակի այդ համերգը հաստատումն է այն բանի, որ անհատն ի զորու է ճշմարիտ ու բարձրարվեստ արժեքի երևութականացում պարտադրել պետությանը:

Թեպետ դա անհատի գործառույթը չէ: Դա նախևառաջ պետության սուրբ գործն է: Միով բանիվ, Արծրունու նախաձեռնությանն առաջինն արձագանքողը դարձյալ անհատ էր՝ նախկին վարչապետ, այսօր Հայ-ռուսական համալսարանի ռեկտոր Արմեն Դարբինյանը, որը պատիվ էր համարել հովանավորել Արտո Չաքմաքչյանի հիշատակի երեկոյի անցկացումը:

Երեք տարբեր սերունդ ներկայացնող երևույթներ էին մեր առջև՝ նույն գաղափարի ներքո՝ Կոմիտաս, Արտո Չաքմաքչյան և Վահան Արծրունի:

Հանրության համար մինչ օրս հայտնության հանգույն է այն, որ Կոմիտասը բանաստեղծ է նաև և երգահան Վահան Արծրունու երաժշտության ներքո արդեն երկրորդ տասնամյակն է հնչում է Կոմիտասի գունեղ ու զրնգուն բանաստեղծական խոսքը:

Երեկվա հիշատակի համերգով Արծրունին առաջին անգամ ներկայացնելով Արտո Չաքմաքչյանի կոմիտասյան թեմաներով գրաֆիկական աշխատանքները՝ մի երկրորդ հայտնություն արեց՝ հանրայնացնելով Արտոյի՝ Կոմիտասի կերպարին ներդաշնակող գրաֆիկական ձևավորումները՝ այդպիսով առանձնահատուկ երևութականացնելով արվեստագետի՝ իրապես բարձրարժեք գործերը:

Պոստերի ֆորմատով ներկայացված աշխատանքները հիշատակի երեկոյի հրաշալի անակնկալն էր ու նաև այն խոր հույսը, որ քանդակագործի բազմաչարչար

«Քայլող մարդը» քանդակն էլ մի օր, ու հուսանք, շուտով կքայլի Երևանով: Հուսանք նաև, որ փոխնախարար Արա Խզմալյանի ներկայությունը համերգին՝ որպես մշակույթի ոլորտի պատասխանատու անձ, զուտ ներկայությամբ չի ավարտվի:

Հ. Գ.
Ի դեպ, երեկվա երեկոն հիշեցրեց նաև մեծ Կոմիտասի 150-ամյա հոբելյանի առիթով՝ Արծրունու մեկ այլ՝ «ԿՈՄԻՏԱՍՈՎ ՆԵՐՇՆՉՎԱԾ» հանրային նախաձեռնության մասին, որի հայեցակարգի շուրջ համախմբվեցին 55 ստեղծագործողներ՝ դասական մեներգից՝ սիմֆոնիկ նվագախմբային, ժամանակակից կամերայինից՝ ֆյուժն և ջազ ձևաչափերը, ակադեմիական աշխարհիկ ոլորտից՝ հոգևոր երաժշտության, դասական անսամբլի տարատեսակները՝ ֆոլկլորային խմբեր, բայց պետությունն այդպես էլ տեր չեղավ բացառիկ այդ նախաձեռնությանը, անհաղորդ մնաց:

Փոխարենը՝ «Կոմիտասի ներշնչանքով» հայեցակարգն ու ստեղծագործական հսկայական ներուժն ու գործը արժևորեց ՀՀ հանրային ռադիոյի տնօրինությունը /տնօրեն՝ Գարեգին Խումարյան/՝ հայաստանյան կատարողների մասնակցությամբ «Կոմիտաս 150 տարի/ րոպե» նախագծի մեջ՝ ձայնագրվելով 9 ժամ հնչողությամբ կոմիտասյան նյութ, ֆոնդավորվելով և ստանալով շքեղ հոբելյանական եռասկավառակի տեսք։

Հեղինակ՝ Անահիտ Եսայան

Աղբյուր` Փաստինֆո