Փաստ ինֆո

«Քաղաքական այն ուժը, որը ես ներկայացնում եմ՝ Քաղաքացիական պայմանագիրը,  այդ ուժի ծրագրում անկյունաքարային դրույթներից մեկը մեր ինքնության պահպանումն ու զարգացումն է»,- Վենետիկում ՝ Մխիթարյան Միաբանությունում, հայտարարեց պաշտոնական այցով Իտալիայում գտնվող վարչապետ ՆԻկոլ Փաշինյանը։

Վարչապետի խոսքով, շատ հաճախ «պսպղան» կարգախոսների ներքո իրականում վնասում ենք ինքներս մեր ինքնությանը, կորցնում հետագիծը, պատմությունն ու ապագայի նկատմամբ պատկերացումները։ Ըստ Փաշինյանի՝ գործող կառավարության կարեւորագույն առաքելությունը պետք է լինի այնպես անել, որ մեր բնության պատմության հետ հաշտ լինենք, ինքներս մեզ ճանաչենք ամբողջության մեջ։

Փաշինյանն ընդգծեց Մխիթարյան Միաբանության ունեցած դերակատարությունը ինքնության ճանաչման գործում, հայտարարեց, որ Հայաստանը պետք է լինի աշխարհի բոլոր հայերի պետությունը, ասաց, որ ՀՀ Սահմանադրության նախաբանում հենց այդպես էլ գրված է՝ որպես պետության հիմնադիր հանդես է գալիս հայ ժողովուրդը։

«Իհարկե, մեր նպատակը եւ աշխատանքը պետք է ուղղված լինի նրան, որ աշխարհի բոլոր հայերը ունենան ՀՀ քաղաքացիություն,  մանավանդ երկքաղաքացիությունը թույլատրված է, աշխարհ բոլոր հայերը պետք է հանդես գան որպես ՀՀ ներկայացուցիչ եւ ՀՀ քաղաքացի»,-ասաց Փաշինյանը։

Ըստ վարչապետի, այսօր հայ ժողովրդին ազգային գաղափարախոսություն է հարկավոր եւ դա  համահայկականությունն է ՝ յուրաքանչյուր հայ, անկախ նրանից, ապրում է կամ չի ապրում ՀՀ-ում, պետք է ապրի Հայաստանով, գոնե օրվա մեջ մի, քան ժամ։

«Հայաստանը պետք է լինի մեր գիտակցության համատեքստը եւ ենթատեքստը»,-ասաց Նիկոլ Փաշինյանը։

Նա նորից հայտարարեց, որ ժողովրդի անունից մանդատ է ստացել, որ գործող կառավարությունը ունի հայ ժողովրդի անունից խոսելու մանդատ ,քանի որ այն գործընթացները,  որոնց արդյունքում ձեւավորվել է կառավարությունը, ընդգրկել են համայն հայությանը։

«ՀՀ ցանկացած կառավարություն պետք է ունենա լեգիտիմություն՝ խոսելու հայ ժողովրդի անունից։ Սա է համահայկականության գաղափարը, կառավարությունը պետք է ձեւավորվի ոչ միայն ազատ ընտրությունների ճանապարհով, այլ պետք է ազգային օրակարգի կառավարություն լինի, բայց ազգային օրակարգի մեծ վերնագրի օրոք շատ երկար ժամանակ ՀՀ-ում ձեւավորվել են կոռուպցիոն կարգեր եւ սա է պատճառը , որ մեր ազգային օրակարգը ընկալելի չէ նրանց ազգային օրակարգի համար, որովհետեւ ազգային օրակարգը շատ երկար ժամանակ ՀՀ-ում եղել է հարմար տանիք՝ մենաշնորհներ հաստատելու, կոռուպցիոն հաստություններ կուտակելու , կուսակցական համակարգ հաստատելու՝ այդ թվում կրթական համակարգում, կրթական համակարգի որակը գցելու այն աստիճան, որ այսօր ՀՀ-ում փոքր բացառություններով կարող ենք ասել, որ գրեթե չկան մրցունակ բուհեր եւ մրցունակ ֆակուլտետներ եւ մենք պետք է գնանք այս պրոբլեմները լուծելու»։

Անդրադառնալով Հայաստան-Սփյուռք հարաբերություններին, Նիկոլ Փաշինյանը հայտարարեց, որ այսօր խնդիրն է դրված՝ ունենալ մի կառույց, որը կունենա լեգիտիմություն եւ որի հետ խոսելով կառավարությունը կարող է ասել՝ խորհրդակցեինք Սփյուռքի հետ։ Նրա խոսքով,  Զարեհ Սինանյանի առաջ դրված կարեւորագույն խնդիրներից մեկն էլ հենց սա է՝ ձեւավորել մի կառույց, որը ինստիտուցիոնալ նոր մակարդակի վրա կդնի ՀՀ-Սփյուռք հարաբերությունները։

Ապա` Նիկոլ Փաշինյանը խոսեց աշխարհաքաղաքական միջավայրի մասին ու հայտարարեց. «Հայաստանը եւ հայ ժողովուրդը պետք է պատրաստ լինեն, որ այն իրավիճակում, երբ աշխարհաքաղաքական միջավայրը կզարգանա այնպես, որ ինչ- որ մարդիկ ինչ- որ տեղ կորոշեն՝  հայկական պետականություն չի, որ գոյություն ունենա , հայ ժողովուրդը կասի, որ ես եմ որոշում՝ հայկական պետականություն գոյություն կունենա, թե ոչ»

Ըստ Փաշինյանի, սրա համար անհրաժեշտ է  նոր կազմակերպում եւ ազգային գաղափարախոսություն, որի կուլմինացիան պետք է լինի  այն, որ ՀՀ ոչ միայն ՀՀ քաղաքացիների, այլեւ աշխարհի բոլոր հայերի  ներկայացուցիչն է եւ շահերի պաշտպանը եւ աշխարհի բոլոր հայերը ՀՀ շահառու են ու ՀՀ  քաղաքացի։

Աղբյուր` Փաստինֆո