Փաստ ինֆո

Տուժող կողմը դեմ է Ռոբերտ Քոչարյանի եւ մյուսների քրեական գործով դատախազ Պետրոս Պետրոսյանին բացարկ հայտնելու պաշտպանական կողմի միջնորդությանը։ Տուժողի իրավահաջորդի ներկայացուցիչ Տիգրան Եգորյանը հայտարարեց, որ ներկայացված փաստարկները հիմնավոր չեն։ Նրա խոսքով՝ որքան էլ դատախազը պարտավոր է հսկողություն սահմանել, ի վերջո դատախազը դատարանում դառնում է կողմ և նախաքննության ընթացքում իրականացվող հսկողություն իրականացնող դատախազը պաշտպանում է մեղադրանքը և այդ կողմից նրա օբյեկտիվությունը կասկածի տակ դնելն իր համար հասկանալի չէ։ Եգորյանը նաև նշեց, որ նյութերը թաքցնելու վերաբերյալ խնդիրը բացարկի հարց չէ և , որ պաշպանության կողմը պետք է ոչ թե դժգոհ լինի, որ դատախազը թերի է ներկայացրել նյութերը, այլ՝ գոհ լինի, քանի որ դա մեղադրանքը պաշտպանելու համար բարդություն է ստեղծում։

Անդրադառնալով դատախազին բացարկ հայտնելու միջնորդություններին՝ տուժողի իրավահաջորդի ներկայացուցիչ Սեդա Սաֆարյանը նշեց, որ Ռոբերտ Քոչարյանի պաշտպան Խուդոյանի ներկայացրած բացարկի հիմքը, որը վերաբերում է Ռոբերտ Քոչարյանի որդու գույքի նկատմամբ արգելանք կիրառելու վերաբերյալ քննիչի որոշմանը, որ այդ հանգամանքը չի կարող դառնալ բացարկի հիմք և մատնանշել դատախազի կողմնակալությունը։ Ինչ վերաբերում է Հովհաննես Խուդոյանի ներկայացրած մյուս հիմքին՝ առերես հարցաքննությանը Ռոբերտ Քոչարյանի բացակայությանը, Սաֆարյանը նշեց, որ վերջինս ինքն է հրաժարվել ստորագրել և ասել՝ ճանաչում է Կարապետյանին, թե ոչ։

Ըստ Սաֆարյանի՝ այդ արձանագրությունը չի կարող դիտվել որպես կեղծիք։ Ավելի վաղ հայտնել ենք, որ ՀՀ երկրորդ նախագահ Ռոբերտ Քոչարյանի պաշտպանական թիմը և ՀՀ ՊՆ նախկին նախարար Սեյրան Օհանյանի պաշտպան Կարեն Մեժլումյանը դատախազ Պետրոս Պետրոսյանին բացարկ հայտնելու միջնորդություն են ներկայացրել։

Հիշեցնենք, որ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Աղբյուր` Փաստինֆո