Փաստ ինֆո

«ԲՀԿ-ի դիրքորոշումն այն է, որ պետք է պատասխանատվություն լինի բացառապես արարքի համար, հատկապես հանրության համար վտանգավոր արարքի համար։ Նախագծում իրավական որոշակիության հետ կապված բաց հարցեր կան։ Ի՞նչ է նշանակում բարձրագույն աստիճանակարգություն, կամ այդ աստիճանակարգությունն ով է տալիս, ով է հանցակազմի սուբյեկտը»,-այս մասին այսօր ԱԺ-ում «ՀՀ Քրեական օրենսգրքում փոփոխություններ եւ լրացումներ կատարելու» եւ «Քրեական դատավարության օրենսգրքում փոփոխություններ եւ լրացումներ» կատարելու մասին օրինագծերի քննարկման ժամանակ ասաց ԱԺ«Բարգավաճ Հայաստան» խմբակցության պատգամավոր Գևորգ Պետրոսյանը։

Հիշեցնենք, որ ինչպես ներկայացրեց Արդարադատության նախարար Ռուսատմ Բադասյանը, նախագծով նախատեսվում է քրեական պատասխանատվություն սահմանել քրեական աստիճանակարգության բարձրագույն կարգավիճակ տալու, ստանալու կամ պահպանելու համար, քրեական ենթամշակույթ կրող խմբավորում ստեղծելու կամ ղեկավարելու համար, քրեական ենթամշակույթ կրող խմբավորմանը մասնակցելու կամ ներգրավելու համար: Քրեական ենթամշակույթ կրող խմբավորման մասնակցին կամ քրեական աստիճանակարգության բարձրագույն կարգավիճակ ունեցող անձին դիմելու համար՝ վերջիններիս անօրինական ազդեցությունն օգտագործելու միջոցով նյութական կամ ոչ նյութական օգուտ կամ այլ առավելություն ստանալու համար։

Պետրոսյանը նշեց, որ հանցավորության դեմ պայքարը պետք է լինի միշտ, հետևողական, ամենօրյա, բայց արդարացի և հիմնավորված։

«Ասում եք քրեական ենթամշակույթ, եթե մի բան ունի «ենթա», ուրեմն պետք է լինի նաև հիմնական։ Այդ ի՞նչ մշակույթ է, որ ունի իր «ենթան», եթե կա մի մշակույթ՝ նշեիք դա «գողական աշխարհի» մշակույթն է, թե՞ որ աշխարհի։ Իսկ եթե դա ընդհանուր մշակույթի մի մասն է, ուրեմն ուզում ենք առանց հանցավոր արարքի դատել մեր երկրում չգրանցված մշակութային գործիչներին»,-ասաց Պետրոսյանը։
Անդրադառնալով ԲՀԿ պատգամավորի այս խոսքերին, «Իմ քայլը» պատգամավոր Ռուբեն Ռուբինյանն իր ելույթում ասաց, որ Գևորգ Պետրոսյանը, ըստ էության, ցույց տվեց քննարկման իրական մեխը։

«Իրականում այնքան էլ անկեղծ չեն մեր գործընկերները, երբ խոսում են իրավական որոշակիության բացակայության մասին, որովհետև փաստացի, եթե դատենք պարոն Պետրոսյանի ելույթից, խնդիրը որոշակիությունը չէ։ Եթե լիներ որոշակիություն միևնույն է ԲՀԿ-ն դեմ էր լինելու, որովհետև ԲՀԿ խմբակցությունը կողմ է պատասխանատվությանն արարքի համար։ Սրա մասին նաև այլ բառերով խոսել էր ԲՀԿ մեկ այլ պատգամավոր Վարդան Ղուկասյանը, որը, մասնավորապես, ասել էր, որ ըստ իրեն և ենթադրում եմ նաև ԲՀԿ խմբակցության, «գողերից» խելոք աշխարհի երեսին չկա, և ինքը հարգում է «ճշտով ապրող» մարդկանց։ Այսինքն` փաստացի կան մարդիկ, որոնք անվանվում են օրենքով գողերը, այսպես կոչված քրեական հեղինակությունները, զոն նայողները և այլն։

Ըստ Վարդան Ղուկասյանի, նորմալ է, որ բոլորն իմանան ինչ է դա նշանակում, որ այդ անձինք ղեկավարում են քրեական խմբավորում, բայց քանի որ իրենք կոնկրետ մի արարքով չեն բռնվել, դա նորմալ է, իրենք դառնում են «քյասիբներին տիրություն անող» մարդիկ»,-ասաց Ռուբինյանը։

Հեղինակ՝ Սոնա Գեւորգյան

Մանրամասները՝ տեսանյութում։Հ

Աղբյուր` Փաստինֆո