Փաստ ինֆո

«Նախորդ տարվա Թավշյա հեղափոխությունն իմ պատկերացրած, իմ երազած հեղափոխության մեկնարկն էր իրականում։ Նախորդ տարվա հեղափոխությունը հող նախապատրաստեց տնտեսական, մշակութային, արժեքների հեղափոխության համար, և ահա սույն օրենքների նախագիծը ես դիտարկում եմ արժեքների հեղափոխության համատեքստում»,-այս մասին այսօր ԱԺ-ում «ՀՀ Քրեական օրենսգրքում փոփոխություններ եւ լրացումներ կատարելու» եւ «Քրեական դատավարության օրենսգրքում փոփոխություններ եւ լրացումներ» կատարելու մասին օրինագծերի քննարկման ժամանակ ասաց ԱԺ «Իմ քայլը» խմբակցության պատգամավոր Մխիթար Հայրապետյանը։

Հիշեցնենք, որ ինչպես ներկայացրեց Արդարադատության նախարար Ռուստամ Բադասյանը, նախագծով նախատեսվում է քրեական պատասխանատվություն սահմանել քրեական աստիճանակարգության բարձրագույն կարգավիճակ տալու, ստանալու կամ պահպանելու համար, քրեական ենթամշակույթ կրող խմբավորում ստեղծելու կամ ղեկավարելու համար, քրեական ենթամշակույթ կրող խմբավորմանը մասնակցելու կամ ներգրավելու համար: Քրեական ենթամշակույթ կրող խմբավորման մասնակցին կամ քրեական աստիճանակարգության բարձրագույն կարգավիճակ ունեցող անձին դիմելու համար՝ վերջիններիս անօրինական ազդեցությունն օգտագործելու միջոցով նյութական կամ ոչ նյութական օգուտ կամ այլ առավելություն ստանալու համար։

Հայրապետյանը նշեց, որ երբեք չէր կարող մտածել, թե որևէ պատգամավոր կգտնվի, որ կկարծի՝ Հայաստանում ավելի «լավ տղա» կարող է լինել, քան օրինակ Ռոբերտ Աբաջյանը կամ Արթուր Ալեքսանյանը, Հենրիխ Մխիթարյանը։

«Երբեք մտքովս չէր անցնի, որ ավելի «լավ տղա» կարելի է համարել նրանց, քան օրինակ Չեքիջյանին ու Մանսուրյանին։ Կարծում եմ՝ նախորդ տարվա փոփոխությունները մեզ հնարավորություն են տալիս էլ ավելի մեծ ազդեցություն ունենալ մշակութային հեղափոխություն, արժեքային հեղափոխություն իրականացնելու այս համատեքստում»,-ասաց «Իմ քայլը» պատգամավորը։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո