Փաստ ինֆո

«Ի՞նչ է նշանակում գող՝ ավազակ, ուրիշի ունեցածը թաքուն հափշտակող և խարդախության յուրացնող։ Նման նշանակություն ունեցող բառով բնութագրվող որևէ անձ չի կարող համարվել հեղինակություն»,-այս մասին այսօր ԱԺ-ում ասաց «Իմ քայլը» խմբակցության պատգամավոր Անդրանիկ Քոչարյանը։

Հիշեցնենք, որ ԱԺ-ն քննարկում է «ՀՀ Քրեական օրենսգրքում փոփոխություններ եւ լրացումներ կատարելու» եւ «Քրեական դատավարության օրենսգրքում փոփոխություններ եւ լրացումներ» կատարելու մասին օրինագծերի փաթեթն առաջին ընթերցմամբ ընդունելու հարցը:

Ինչպես ներկայացրեց Արդարադատության նախարար Ռուստամ Բադասյանը, նախագծով նախատեսվում է քրեական պատասխանատվություն սահմանել քրեական աստիճանակարգության բարձրագույն կարգավիճակ տալու, ստանալու կամ պահպանելու համար, քրեական ենթամշակույթ կրող խմբավորում ստեղծելու կամ ղեկավարելու համար, քրեական ենթամշակույթ կրող խմբավորմանը մասնակցելու կամ ներգրավելու համար: Քրեական ենթամշակույթ կրող խմբավորման մասնակցին կամ քրեական աստիճանակարգության բարձրագույն կարգավիճակ ունեցող անձին դիմելու համար՝ վերջիններիս անօրինական ազդեցությունն օգտագործելու միջոցով նյութական կամ ոչ նյութական օգուտ կամ այլ առավելություն ստանալու համար։

«Տարիներ շարունակ այսօրինակ բնորոշումը ստացել է «քրեական հեղինակություն», «հարց լուծող», «ճշտող տղերք» հասկացությունները։ Պետության օրենքների սահմաններից դուրս ոչ ոք ու ոչինչ հարց լուծել չի կարող, այս երևույթը սերում է դեռևս խորհրդային տարիներից, երբ ազգերի հայր Ստալինի օրոք նմանատիպ բանդաների ձևավորումը որոշակի մարդկային խմբերը կառավարելի դարձրեց, իսկ հայաստանյան իրականության մեջ դրանց կշիռը հատկապես բարձրացավ նախկինում ընտրական գործընթացներում նրանց կողմից անվերապահորեն մատուցված ծառայությունների արդյունքում»,-ասաց Քոչարյանն ու նշեց, որ այդ բանդաները ժամանակին իրենց կանոններով լուծել են միայն իրենց շրջապատին վերաբերող հարցերն ու խնդիրները, սակայն այժմ ոչ միայն հասարակության շրջանում ազդեցություն ունեն, այլև փորձ են անում իրենց կամքը թելադրել քաղաքական իրադարձությունների ու զարգացումների ուղղությամբ։

Անդրանիկ Քոչարյանի խոսքով, աստիճանաբար քաոսի վերածված քրեական ենթամշակույթն անկանոն կերպով տարիների ընթացքում թափանցել է նաև քաղաքական կառավարման դաշտ. «Եթե ոչ ուղղակիորեն, ապա գոնե քրեական աստիճանակարգության բարձր կարգավիճակ ունեցող անձանց կողմի հաստատված նշանակումների տեսքով։ Վերջիններս էլ իրենց հերթին ներկայացել են որպես օրենքով գողերի շահերի պաշտպաններ քաղաքական հարթակներում»։

Պատգամավորը նշել է, որ պետք է ձերբազատվել քրեական հեղինակությունների պետական համակարգի սպասարկումներից և հարված հասցնել նրանց, ովքեր հանդիսանում են տվյալ ավանդույթների ու համակարգի օժանդակողները։

«Նախագծով շոշափելի փոփոխություններ են ակնկալվում քրեակատարողական հիմնարկներում, որոնց կառավարումը բավականին երկար ժամանակ անմիջականորեն իրականացվել է քրեական հեղինակությունների կողմից, որտեղ նրանք ունեցել են անսահմանափակ արտոնություններ»,-շեշտեց Քոչարյանը։

Հեղինակ՝ Սոնա Գեւորգյան

Աղբյուր` Փաստինֆո