Փաստ ինֆո

«Ես ինձ համարում եմ այն սերնդի ներկայացուցիչը, որը ձևավորվել է մեր պետության անցումային շրջանում, և այդ անցումային շրջանի համար, որի հիմնական բնութագրիչն այն էր, որ մարդիկ միմյանց հորդորում էին սպասել երկար այն օրվան, երբ հնարավոր կլինի բարձրագույն կրթություն ստանալ, ոչ թե սեփական գիտելիքների, այլ այն կարողությունների դիմաց, որին տիրապետում է հայրդ, հորեղբայրդ կամ քեռիդ։ Այդ նույն անցումային շրջանում հասարակության յուրաքանչյուր 3-րդ անդամ կարող էր հեշտությամբ համոզել, որ դատարանում արդարադատությունը միևնույն է իրականացվելու է այն կողմի օգտին, ով ազդեցության ավելի մեծ լծակներ ունի»,-այս մասին այսօր ԱԺ-ում ասաց «Լուսավոր Հայաստան» խմբակցության կողմից առաջադրված Կոռուպցիայի կանխարգելման հանձնաժողովի անդամի թեկնածու Հայկուհի Հարությունյանը։

Նա նշեց, որ այդ նույն անցումային շրջանում հասարակությունն ինքն իրեն չէր ընկալում որպես իր իրավունքների և արժանապատվության պաշտպանությամբ ապրող քաղաքացի, այլ գիտակցում էր, որ իր պաշտպանությունը կապված է լինելու այն կապերից, հովանավորչությունից և քավորների քանակից, որ ունի։
«Եվ այս սխեմատիկ փուլում էր, որ հիմք դրեց այն պետական ինստիտուտներին և բրգաձև կառավարման համակարգին, որի հիմնական նպատակը կոնկրետ խմբակային շահերի պաշտպանությունն էր։ Ինքս որպես ՀՀ քաղաքացի, այդ անցումային շրջանում որոշակի ժամանակ սպասեցի, բայց նաև գիտակցաբար հասկացա, որ այդ սպասումը փոփոխության որևէ դրական արդյունքի չի հանգեցնելու, և փոփոխությունը պայմանավորված է լինելու միայն սեփական կամքի, կարողության և ամենօրյա աշխատանքի ներդրմամբ։ Կարծում եմ՝ շատ բնութագրիչ եղավ, որ այդ գիտակցությունը միավորեց ոչ միայն ինձ, այլև ՀՀ բոլոր այն քաղաքացիներին, ովքեր 2018թ-ի ապրիլին փողոց դուրս եկան և կարողացան վերականանգել այն արդարությունը, որին արժանի էր ՀՀ յուրաքանչյուր քաղաքացի»,-ասաց Հարությունյանը։

Նրա խոսքով, Թավշյա հեղափոխությունը ՀՀ քաղաքացուն հեշտությամբ չտրվեց. « Կդժվարանամ մանրամասներ ներկայացնել այն մասին, թե ինչ էր կատարվում ապրիլյան հեղափոխության օրերին փողոցներում, բայց երկար կարող եմ խոսել, թե ինչ էր տեղի ունենում ոստիկանության բաժիններում, որտեղ անցկացրի իմ հիմնական ժամանակը՝ գտնվելով այն բոլոր քաղաքացիների կողքին, ովքեր բերման էին ենթարկվում հավաքների մասնակցության և իրենց իշխանությունը վերանվաճելու համար»։

Խոսելով կոռուպցիայի մասին, Հարությունյանն ասաց, որ դրա տարածման գործում հիմնական պատճառը եղել է այն, որ տարբեր մակարդակներում եղել է կոռուպցիայի նկատմամբ խիստ հանդուրժողականություն։

«Կարծում եմ, որ այդ հանդուրժողականությունն արմատախիլ անելու համար իրագործման մեխանիզմները, որոնք այս պահին ուրվագծված են օրենսդրության շրջանակներում, պետք է կյանքում ռեալ իրագործման հնարավորություն ստանան, և այդ համատեքստում ինձ համար շատ կարևոր են կրթական մեխանիզմները, որոնք ոչ միայն հանրակրթական դպրոցների, հանրակրթական հաստատությունների շրջանակներում, այլև հենց կոնկրետ պետական պաշտոնյաների շրջանում պետք է արմատավորվեն»,-ասաց ԼՀԿ թեկնածուն։

Նրա խոսքով, կոռուպցիայի նկատմամբ զրո հանդուրժողականության վերաբերմունքի փոփոխության գործում շատ կարևոր է ազդարարների ներդրման ինստիտուտը. «Ոչ օրենքի, ոչ կոռուպցիայի վերաբերյալ կառավարության ծրագրի շրջանակներում դրա իրագործման մեխանիզմները չկան, և ես կարծում եմ ու վստահ եմ, որ հանձնաժողովի հիմնական գործունեության մասը անդրադառնալու է դրան»։

Աղբյուր` Փաստինֆո