Փաստ ինֆո

«Կառավարությունը այս հարցում գնալու է վճռական, սկզբունքային եւ հետեւողական փոփոխությունների։ Այստեղ, ինչպես մի քանի անգամ ասել եմ, կառավարության եւ ըստ էության, ՀՀ քաղաքացիների ոտքերից կախվելը եւ նրանց ճահիճների մեջ քաշելը եւ այնտեղ պահելը չի ստացվելու եւ ես ուզում եմ, որ մենք սա հստակ արձանագրենք»,- «Բարձրագույն կրթության և գիտության» օրենքի նախագծի քննարկմանը հայտարարել է ՀՀ վարչապետ Նիկոլ Փաշինյանը։

ԿԳՄՍ նախարար Արայիկ Հարությունյանն իր ֆեյսբուքյան էջում տեսանյութ է հրապարակել՝ նշելով, որ վարչապետ Նիկոլ Փաշինյանի հետ քննարկել են «Բարձրագույն կրթության և գիտության» օրենքի նախագիծը։

Փաշինյանը հայտարարել է, որ գոյություն ունեցող կրթական համակարգը չի ապահովում երկրի զարգացումը, չի ապահովում երկրի, ժողովրդի, ազգի ձգտումներն ու ամբիցիաները, որոնք այսօր արդեն ձեւակերպված են որպես կառավարության ծրագիր եւ ռազմավարություն։ Նրա խոսքով, կառավարությունը ճշմարտության միակ աղբյուրը չէ, սակայն հստակ է, որ այլեւս այսպես շարունակվել չի կարող։ Համակարգը պետք է բարեփոխել այնպես, որ ոչ միայն հետագա բնականոն զարգացումն ապահովվի, այլեւ հնարավորինս կրճատվի բաց թողնված ժամանակը։

Ըստ Փաշինյանի, պետք է կարողանալ պրոֆեսիոնալ, շահագրգիռ քննարկում կազմակերպել, լսել բոլոր կարծիքները։ «Ողջ պրոցեսի մեջ առանցքային նշանակություն պետք է ունենա երկխոսությունը, այդ երկխոսությունը եւս կառավարության առաջնահերթությունն է», - ասել է Նիկոլ Փաշինյանը՝ հավելելով, որ կառավարության խնդիրն է հնարավորինս ընդգծել բարեփոխումների հեղինակների շրջանակը։

Միեւնույն ժամանակ Նիկոլ Փաշինյանը հայտարարել է, որ ՀՀ կառավարությունը, որը ունի ՀՀ ժողովրդի վստահությունը եւ աջակցությունը, ինքն իրենով կարող է հեղինակ լինել բոլոր այն դեպքերում, երբ տեսնի, որ երկխոության պատրաստակամությունը փորձ է արվում օգտագործել պրոցեսները կանգնեցնելու համար։

«Սա չի լինելու, ես ուզում եմ, որ մենք բոլորս արձանագրենք եւ հստակ գնանք առաջ»,-եզրափակել է Փաշինյանը։

Աղբյուր` Փաստինֆո