Փաստ ինֆո

ՀՀ 2-րդ նախագահ Ռոբերտ Քոչարյանի գործը կապված է մեկ անձի կամքի հետ, նա քաղաքական անձնավորություն է եւ այդ անձը վարչապետն է։ Այս մասին լրագրողների հետ հանդիպմանը հայտարարեց ՀՀ 2-րդ նախագահ Ռոբերտ Քոչարյանի գործով ֆրանսիացի փաստաբան Սեւակ Թորոսյանը։ Փաստաբանը հայտարարեց, որ այսօր Հայաստանում դատարանի անկախության սկզբունքի մասին չենք կարող խոսել։

«Որեւէ երաշխիք չկա։ Դավիթ Գրիգորյանի պատկերը հզոր ձեւով բոլոր դատավորների մտքում է՝ ով կփորձի անկախ դատավարել եւ վարչապետի ուզածին չհամապատասխանող որոշում կայացնել, նրա մտքին 3 բան կգա ՝ խուզարկություն, քրեական գործ, հեռացում։ Հայաստանում դատավորները աղոթում են, որ մեծ գործերով չզբաղվեն, որոնք վարչապետի երեւակայական թշնամիներին են վերաբերում»,-հայտարարեց Սեւակ Թորոսյանը։

Ֆրանսիահայ դատավորի խոսքով այսօր Հայաստանում դատավորների պատերազմ պետք է սկսվի, որը ըստ նրա, միակ միջոցն է անկախ դատական համակարգ ունենալու։ «250-300 դատավոր ունեք, պատմությունը իրենց անունը պետք է հիշի եւ սուտ դատավորների, որ դատավոր են դարձել՝ մոռանալով, որ սա պատերազմի դիրք է»,-նշեց փաստաբանը։
Նա ասաց՝ պետք է նայել այլ երկրների դատարանների անկախության պատմությունը, այն, ինչ հիմա կատարվում է, այլ երկրներում կատարվել է եւ դավիթգրիգորյանները այդ անկախությունը ձեռք բերած դատավորների շարքում են ։
«Դատավորը, եթե չանկախանա, մնա գործադիր մարմնի աշխատակից, ես ապագա չեմ տեսնում»,-ասաց Սեւակ Թորոսյանը։
Նա տեղեկացրեց, որ Ռոբերտ Քոչարյանի գործից տեղյակ է նաեւ Ֆրանսիայի նախագահ Մակրոնը։ «Ես վերջերս նախագահ Մակրոնին նամակ էի գրել, օֆիցիալ նամակ էի ուղարկել, որպեսզի մեկ տարվա ընթացքը իմանա։ Մեկ ամիս չանցավ, նախագահ Մակրոնից նամակ ստացա, ուր ասում է ՝ վստահ եղեք, որ Ֆրանսիան հետեւում է Ռոբերտ Քոչարյանի դատավարությանը։ Սա հետաքրքրական է, որովհետեւ՝ նախ նախագահը ինձ պատասխանելու պարտականություն չուներ, ես պատասխանի չէի սպասում, բայց ինքը որոշեց պատասխանել՝ գրավոր, իմանալով որ այդ պատասխանը իմ գրասենյակի 4 պատերից ներս չի մնալում»,-ընդգծեց փաստաբանը։

Նա կարեւորեց նաեւ ՌԴ նախագահ Պուտինի հանդիպումը Ռոբերտ Քոչարյանի տիկնոջ՝ Բելլա Քոչարյանի հետ։

Աղբյուր` Փաստինֆո