Փաստ ինֆո

Անդրազգային հանցավոր խմբի կողմից թմրամիջոցների մաքսանենգության գործով կալանավորված ԻԻՀ քաղաքացի հանդիսացող Անժելա Մինասյանն ազատ է արձակվել։ 

Վերաքննիչ քրեական դատարանը բավարարել է փաստաբան Վահագն Քեշիշյանի վերաքննիչ բողոքը՝ Երեւանի ընդհանուր իրավասության դատարանի հոկտեմբերի 6-ի որոշման դեմ եւ վերացրել նրա նկատմամբ որպես խափանման միջոց ընտրված կալանավորումը։ Դատարանը պարտավորեցրել է վարույթն իրականացնող մարմնին նրան անհապաղ ազատ արձակել։

Հիշեցնենք, ԱԱԾ-ն պաշտոնապես հայտարարել էր, որ ձեռք բերված նախնական տվյալների համաձայն՝ ԻԻՀ-ի և ՀՀ-ի երկքաղաքացի հանդիսացող 23-ամյա կինը, ասեղնագործ ժանյակի կծիկի մեջ թաքցնելով 8 հատ բամբակյա խոնավ կտորներ (մառլյայատիպ) ներծծված առանձնապես խոշոր չափերի՝ մոտ 900 գրամ քաշով «մեթամֆետամին» տեսակի թմրամիջոց, փորձել է փոստային առաքանու միջոցով այն ուղարկել Ավստրալիա, որտեղ հասցեատերը չորացած կտորների վրայից քերման եղանակով հեռացնելու էր թմրամիջոցը: Ըստ հաղորդագրության, առերևույթ հանցագործության դեպքի առթիվ ՀՀ ԱԱԾ քննչական դեպարտամենտում հարուցվել էր քրեական գործ՝ ՀՀ ՔՕ համապատասխան հոդվածներով: Անձը ձերբակալվել էր:

Փաստաբան Վահագն Քեշիշյանը «Փաստինֆո»-ին տեղեկացրեց, որ 23-ամյա կինը, որի մասին նշվում է հաղորդագրության մեջ, 72 ժամ անազատության մեջ պահվելուց հետո ազատ է արձակվել եւ գործով անցնում է որպես վկա։ Նույն գործի շրջանակում ձերբակալվել է նրա մայրը՝ ԻՀՀ քաղաքացի Անժելա Մինասյանը, որին մեղադրանք է առաջադրվել առանձնապես ծանր հանցագործություն կատարելու համար։

«Դատարանը եկավ այն համոզման, տվյալ գործով Անժելա Մինասյանի արարքի սուբյեկտիվ կողմը՝ դիտավորությունը հիմնավորող տեղեկություններ չկան, այսինքն, փաստեր չկան, որ գիտեին կամ կարող էին իմանալ ապրանքի պարունակության մասին»,-ասաց փաստաբանը՝ հավելելով, որ ակնկալում է, որ մոտ օրերս հանցակազմի բացակայության հիմքով իր պաշտպանյալին առաջադրված մեղադրանքը կհանվի։

Հավելենք, որ ԱԱԾ-ն հայտնել էր, որ գործընկեր պետությունների հատուկ ծառայությունների հետ ձեռնարկվում են համապատասխան օպերատիվ-հետախուզական և քննչական անհետաձգելի միջոցառումներ՝ անդրազգային հանցավոր խմբի մյուս անդամներին բացահայտելու ուղղությամբ:

Աղբյուր` Փաստինֆո