Փաստ ինֆո

«Այսօրվա փակուղային իրավիճակը, ռիսկային է այն առումով, որ մենք ավելացնում ենք Ադրբեջանի քաղաքական ռեսուրսները՝ համոզելու աշխարհին, որ տեսեք Հայաստանն ապակառուցողական է, որևէ բանակցային դիրքորոշում չի ձևավորում։ Հայաստանը հայտարարել է մի անորոշ սկզբունք, որ պետք է գտնել այնպիսի լուծում, որը երեք կողմերի համար ընդունելի լինի, բայց չի ասում, թե որոնք են այդ լուծումները»,-այս մասին այսօր լրագրողների հետ ճեպազրույցում ասաց ՀՀ պաշտպանության նախկին նախարարի առաջին տեղակալ Արտակ Զաքարյանը։

Խոսելով խնդրի լուծման նախկին իշխանության քաղաքականության մասին՝ նա ասաց, որ Սերժ Սարգսյանը չէր պատրաստվում հողեր հանձնել, ընդհակառակը՝ մասնակցել ու ղեկավարել է ազատագրման պրոցեսը։

Անդրադառնալով Ապրիլյան պատերազմին՝ Զաքարյանն ասաց, որ հակառակորդի կողմից հարձակումն եղել է անակնկալ։

«Մինչև Ապրիլյան պատերազմը՝ սահմանի մի շարք հատվածներ կահավորվել են հեռադիտարկման սարքավորումներով և համապատասխան ժամանակակից տեխնիկայով...պատերազմի ժամանակ հակառակորդի հարձակումն անակնկալ է եղել, որովհետև բանակցային գործընթացում հակառակորդին որևէ շանս տրված չէր և որևէ քաղաքական հնարավորություն հակառակորդը չի ունեցել մարտական գործողություններ սկսելու։ Դա եղել է ռազմական ավանտյուրա, որի միջոցով հակառակորդը փորձել է խառնել բանակցային գործընթացում եղած դիրքերն ու ձախողել է»,-նշեց պաշտպանության նախկին նախարարի առաջին տեղակալը։

Դիտարկմանը, թե վարչապետն ասում է, որ հետախուզական տվյալներ են եղել, որոնցով նշվել է, որ հարձակում է սպասվում, Զաքարյանը պատասխանեց. «Եթե այդպիսի փաստաթղթի ծանոթացել է, թող բարի լինի դրանից հետևություններ անել։ Ես պնդում եմ, որ հետախուզությունը նման բան չի ահազանգել»։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո