Փաստ ինֆո

«Փաստինֆո»-ի հարցերին է պատասխանել ՀՅԴ բյուրոյի անդամ Արմեն Ռուստամյանը։

- Նիկոլ Փաշինյանն ասում է, որ Արցախի հարցը պետք է որոշի Արցախի ժողովուրդը, հարկ եղած դեպքում՝ հանրաքվեով։ ՀՅԴ-ն այս կապակցությամբ ի՞նչ է մտածում։

- Ղարաբաղի հարցը ժողովուրդն արդեն լուծել է։ Ղարաբաղի հարցը ժողովուրդը Արցախի Հանրապետության  սահմանադրության 175-րդ հոդվածով սահմանել է, թե ինչպես է պատկերացնում լուծումը։ Այնտեղ նշված է, որ այս ստատուս քվոն պետք է պահպանվի այնքան ժամանակ, քանի չի ճանաչվել Ղարաբաղի անկախությունը, չի վերականգնվել նրա տարածքային ամբողջականությունը և հստակեցվել սահմանները։ Սա է պատկերացնում որպես լուծում նաև դաշնակցությունը։

- Վարչապետն ասում է, որ «Հայաստանն Արցախ է և վերջ»։ Այս  արտահայտությունը որքանո՞վ է վտանգավոր։

- Ամբողջ հարցն այն է, որ վարչապետը մեկ ասում է՝  ինքը չի կարող փոխարինել Ղարաբաղին,  չունի այդ մանդատը և ուրեմն Ղարաբաղը պետք է ներկա լինի բանակցային սեղանին, ինչը նշանակում է անկախության անվերապահ ընդունում։ Հետո ասում է Արցախը Հայաստան է և վերջ, որը միացումի մասին է խոսում։ Այսինքն այսօր իշխանությունները ժողովրդական լեզվով ասած էս երկուսի արանքում տվայտվում է՝ անկախություն և միացում։ Մեր առաջարկը շատ հստակ է։ Դա ռազմավարական դաշինքի գաղափարն է, որն այս երկու հասկացություններն իրար հետ է կապում, սահմանում է երկու հայկական պետությունների տեղը, դերակատարությունը բանակցություններում,  ցույց է տալիս կարգավորման ուղղությունը։

- Ասում են՝ Արցախի հետ կապված վարչապետի հայտարարությունները ներքին լսարանի համար են նախատեսված և  նա չի պատկերացնում դրանց կարևորությունն արտաքին դաշտում։ Ի՞նչ եք կարծում։

- Պետք է հայտարարություններն այնպես լինեն, որ դրանք թե՛ ներսում մոբիլիզացնեն, որովհետև եթե միասին և համախմբված չլինենք, որևէ հայանպաստ  լուծում հնարավոր չէ ունենալ, և՛, բնականաբար, խոցելի չդարձնեն մեր դիրքերը բանակցային գործընթացում։ Այս երկուսը նկատի ունենալով՝ պետք է կատարել բոլոր հայտարարությունները, որն իշխանությունների սրբազան պարտքն է։

- Արցախի երկու նախագահները երաշխավորություն ներկայացրեցին Ռոբերտ Քոչարյանի համար։ Այդ կապակցությամբ տեսակետներ են հնչում, որ սրում մտցվեց Արցախի և Հայաստանի հարաբերությունների միջև։

-Ռոբերտ Քոչարյանի վերաբերյալ մարդիկ իրենց իրավունքն ունեն այդ տեսակետը հայտնելու։ Երբ ամպագոռգոռ հայտարարում են՝ ուղղակի ոտնահարելով անմեղության կանխավարկածը, զանազան թեզեր են հրապարակ բերում, ուրեմն երբեք թող վատ չզգան, որ կլինեն մարդիկ , որոնք դրան դեմ են, ունեն իրենց կարծիքը և այդ կարծիքն արտահայտում են շատ հստակ ու ավելի հիմնավորված։ Ռոբերտ Քոչարյանի գործը դարձել է լակմուսի թուղթ, որով շատ հստակ երևում է, թե մեր իրավական համակարգն ինչպիսի անառողջ վիճակում է։ Իրավակարգի պահպանման հարց է առաջացել արդեն։ Տեսեք՝ շղթայական ինչեր առաջացան՝ դատարանների արգելափակում, ՍԴ-ի վրա այս հարձակումները, մարդկանց հանիրավի, անմեղ տեղը ձերբակալել հետո բաց թողնել։ Մի մասն էլ դեռ ձերբակալված է, բաց թողնված չէ։ Հասարկությունն ու պետությունը պատանդ է դարձել մի մարդու ցանկություններին։

- Հրայր Թովմասյանի շուրջ տեղի ունեցող պրոցեսներն է՞լ եք սրա հետ կապում։

-Իհարկե, միանշանակ։ Ինչու միայն ես ե՞մ կապում։ Ով որ աչք ունի, տեսնում է։ 

Աղբյուր` Փաստինֆո