Փաստ ինֆո

«Պատերազմի հավանականություն կա՞, թե՞ չկա, մենք պատրաստվո՞ւմ ենք պատերազմի, եթե պատրաստվում ենք, պատրաստվում ենք, որ պարտվե՞նք, թե՞ պատրաստվում ենք որ հաղթենք»,- «Վերնատուն» հասարակական-քաղաքական ակումբի համաժողովում հարցադրում հնչեցրեց ՀՅԴ Բյուրոյի ներկայացուցիչ Հրանտ Մարգարյանը։

Ըստ նրա՝ եթե մի ղեկավարություն ժողովրդին ուզում է ոտքի հանել, որ իրենից ավելի մեծ հնարավորություններով ուժին հաղթի, ապա պետք է միասնականություն ստեղծի, համախմբի ժողովրդին։ «Մեզ մոտ այդպե՞ս է, թե պառակտում է, սեւ ու սպիտակ է, ղարաբաղցի-հայաստանցի է ։ Ով փորձում է խոսել, նկատե՞լ եք, թալանի ու կոռուպցիայի հոդված են կպցնում են պոչից։ Կոռուպցիան ու թալանը այլեւս տեռորի միջոց են քաղաքական միտքը, խոսքը խեղդելու համար»,-հայտարարեց Հրանտ Մարգարյանը ու շեշտեց, որ այս ձեւով չենք կարող գնալ կռվի եւ հաղթել։

Խոսելով բանակից՝ նա ասաց՝ այսօր ունենք վարկաբեկված սպայական կազմ, իրավիճակ, որտեղ նույնիսկ ապրիլյան նահատակներն են շահարկման նյութ դառնում։ Ապա հարցրեց՝ սպան պետք է ուժ տա՞ զինվորին, թե՞ մտածի, որ վաղը թիկունքում իրեն դատելու են։

Անդրադառնալով ԼՂ հիմնախնդրի շուրջ Նիկոլ Փաշինյանի հայտարարություններին՝ Մարգարյանը նկատեց՝ հակասությունների շղթա է, շփոթ։ Ասաց Փաշինյանի՝ «Արցախը Հայաստանն է եւ վերջ»-ը ոչ Բաքվին, ոչ էլ աշխարհին էր ուղղված, այլ հենց Արցախին ։ «Ղարաբաղցուն ասում է՝ Արցախը Հայաստանն է, որ ես եմ քո իշխանությունը, քո վարչապետը, քո իշխանությունը շինծու է, նա չի ասել ադրբեջանցիների համար»,-հայտարարեց Հրանտ Մարգարյանը՝ նկատելով, որ այդ հայտարարությունը խանգարել է նաեւ բանակցային տակտիկային։

Անդրադառնալով Փաշինյանի հայտնի թեզին, թե ԼՂ հիմնախնդրի լուծումը պետք է ընդունելի լինի Հայաստանի, ԼՂ-ի ու Ադրբեջանի ժողովուրդների համար եւ որ Փաշինյանն առաջինն է ՀՀ ղեկավարներից, որ նման հայտարարություն է արել՝ Հրանտ Մարգարյանն ասաց. «Ենթատեքստում ասում է չէ՞, ասում է՝ ես պատրաստ եմ մի բան հավելյալ զիջել, որ նախորդները պատրաստ չէին զիջել, ես զարմանում էլ ի՞նչ պետք է զիջի, որ Լեւոն Տեր -Պետրոսյանից շատ զիջի, մյուսները, դեռ ոչինչ»։

Հրանտ Մարգարյանն ասաց, որ այդ կեցվածքը պայքարող ժողովրդի քաղաքական ղեկավարի կեցվածք չէ, նշեց , որ այսօր Հայաստանում վախի մթնոլորտ է՝ ոչ անպայման վախ ֆիզիկական հալածանքից, այլ վախ՝ խայտառակ լինելուց, մարդկանց խոսակցության նյութ դառնալուց, որ վաղը կասեն՝ կոռումպացված, թալանչի է... ։

«Իմ կոչն է չվախենալ ոչ մի բանից, չվախենալ ֆեյքերից, թող ինչ ուզում են՝ ասեն։ Նպատակը հոգեբանական ազդեցությունն է, որ ուզում են թողնել»։
Հրանտ Մարգարյանն ասաց ՝գաղափարի շուրջ հավաքվելը բավարար չէ, պետք է կազմակերպվածություն դրսեւորել։ Նա ընդգծեց՝ փրկությունն Արցախից է գալու։

«Փրկությունն Արցախից է, Արցախում չկա նախագահական ընտրությունների օրակարգ, սուտ է, Արցախում մի օրակարգ կա՝ Արցախի արժանապատվությունը վերականգնելու՝ իբրեւ ազգային ազատագրական պայքարի օրրան իր տեղը համահայկական օրակարգում վերագտնելու։ Այս անհրաժեշտությունը կա Արցախում։ Հավատում եմ, Արցախցին այնքան իմաստուն է, որ իր քվեարկությամբ փրկություն կբերի հայ ժողովրդին եւ չի ընտրելու նրանց , որոնք Փաշինյանի փեշերի տակ ծվարել են, կընտրի այն մարդուն, որը ոչ թե հականիկոլ է, այլ Արցախի արժանապատվության տերն է եւ կարող է հավասարը հավասարի հետ դիալոգ »։

Հրանտ Մարգարյանն ասաց, որ եթե մի օր վստահ լինի, որ այս իշխանությունը Ղարաբաղի հարցով պատրաստ չէ որեւէ բան զիջել, պատրաստ է գնալ կռվել եւ հաղթել, այս իշխանության հետ կհամագործակցի ու խնդիր չի ունենա, որոհետեւ մյուս խնդիրները երկրորդական են։ «Բայց, եթե Արցախի հարցով ես ունեմ մտահոգություն, ամեն ինչ անելու եմ, որ այս իշխանությունները, լինի արտահերթ , թե հերթական ընտրություններ , չընտրվեն»,-եզրափակեց նա։

Աղբյուր` Փաստինֆո