Փաստ ինֆո

Գլխավոր դատախազությունը մերժել է ԱԺ նախկին նախագահ Արա Բաբլոյանին մեղադրանք առաջադրելու և նրա նկատմամբ քրեական հետապնդում իրականացնելու որոշման դեմ բողոքը։ Այս մասին «Փաստինֆո»-ին հայտնեց Արա Բաբլոյանի փաստաբան Արամ Վարդևանյանը՝ նշելով, որ դա կանխատեսելի որոշում էր։

Հարցին,թե ինչ հիմքով է մերժվել բողոքը՝ Վարդևանյանը պատասխանեց. «Որպես այդպիսին հիմք առկա չէ։ Մեր կողմից բողոքը բավականին ծավալուն էր։ Մենք մեկ կոնկրետ հարցի վերաբերյալ չենք ներկայացրել. ներկայացրել ենք 300-րդ հոդվածի հանցակազմի տեսանկյունից մինչև գործառութային անձեռնմխելիության հետ կապված հարցերը»։ Վարդևանյանի խոսքով՝ դրանցից ոչ մեկի հետ կապված սպառիչ պատասխան չեն ստացել։

Դատախազության կողմից տրված պատասխանում անձեռնմխելիության հետ կապված՝ քվեարկության և կարծիքի վերաբերյալ հիմնավորմանը որևէ կերպ չեն անդրադարձել և խոսքը գնում է փաստաղթերի կեղծման հետ կապված հարցին, որի վերաբերյալ պաշտպանական կողմը համապատասխան հիմնավորում է ներկայացրել։

Ըստ նրա՝ բոլոր հնարավոր իրավակարգավորումներով հաշվարկ անելու դեպքում ակնհայտ է, որ Գագիկ Հարությունյանի՝ ՍԴ նախագահի պաշտոնից լիազորությունների դադարեցման համար ժամկետի կեղծման անհրաժեշտություն չկար, ավելին՝ նման կեղծիք չի էլ արվեն։

Ինչ վերաբերում է ՍԴ լիազորությունների տնօրինելու համար հարուցված քրեական գործի հանցակազմին, Վարդևանյանը նշեց, որ ՍԴ լիազորությունները սպառիչ թվարկված են Սահմանադրությամբ և այլ իրավական ակտով չեն կարող սահմանվել։

«Այդտեղ չկա ՍԴ նախագահի ընտրությունը որպես ՍԴ հավաքական լիազորություն։ ՍԴ նախագահի ընտրությունը նոր Սահմանադրությամբ ենթադրում է ՍԴ 9 դատավորներից յուրաքանչյուրի իրավունքը՝ առաջադրվելու և լիազորությունը՝ քվեարկելու։ Յուրաքանչյուր կոնկրետ դատավորի, այլ ոչ՝ ամբողջ դատարանի»,-ասաց Վարդևանյանը՝ ընդգծելով, որ վերոնշյալ հարցերի շուրջ մանրամասն ներկայացրել են բողոք, սակայն սպառիչ պատասխան չեն ստացել։

«Ես հասկանում եմ, որ նախաքննության գաղտնիությունից ելնելով, որոշակի զսպվածություն կարելի է նկատել»,- նշեց պաշտպանը՝ հավելելով, որ բացի փաստական հանգամանքներից ներկայացվել է նաև Առուշան Հակոբյանի դիրքորոշումը և դրա նկատմամբ ևս արձագանք չեն ստացել։

Արամ Վարդևանյանը նաև հայտնեց, որ, թեև Դատախազությունից սպառիչ պատասխան չեն ստացել, սակայն Դատախազությունը վերջում արձանագրել է, որ բողոքում բարձրաձայնված հարցերի մասով վերջիններիս կողմից ցուցում է տրվել, որ ի պաշտպանություն այս հիմնավորումների քննչական գործողություններ կատարվեն բազմակողմանիության, օբյեկտիվության, լրիվության պահպանման նպատակով։

Հիշեցնենք, որ հոկտեմբերի 28-ին ՀՔԾ-ում հարուցված քրեական գործի շրջանակներում մեղադրանք է առաջադրվել ԱԺ նախկին նախագահ Արա Բաբլոյանին՝ ՀՀ քրեական օրենսգրքի 300-րդ հոդվածի՝ իշխանության յուրացման և 314-րդ-ն է՝ պաշտոնական կեղծիքի մասով։ Նշենք, որ նույն քրեական գործով մեղադրանք է առաջադրվել նաև ԱԺ աշխատակազմի ղեկավարի նախկին տեղակալ Արսեն Բաբայանին՝ 38-300-րդ հոդվածի 1-ին մասով և 314-րդ հոդվածի 1-ին մասով նախատեսված հանցավոր արարքների՝ իշխանության յուրացմանը օժանդակելու և պաշտոնեական կեղծիք կատարելու հատկանիշներով։ Արա Բաբլոյանը հայտարարել է, որ պայքարելու է իր բարի համբավը վերականգնելու համար։

Իզաբել Սահակյան

Աղբյուր` Փաստինֆո