Փաստ ինֆո

ՀՀ վարչապետ Նիկոլ Փաշինյանն այսօր հրաժարվել է հանդիպել ապրիլյան պատերազմի մասնակիցների հետ, որոնք ուզում էին նրան փոխանցել կարեւոր փաստաթղթեր։

«Այստեղ ենք եկել, որովհետեւ շատ կարեւոր փաստաթղթեր ունենք ներկայացնելու ՀՀ վարչապետ Նիկոլ Փաշինյանին, դրանք վերաբերում են մեր ազգային անվտանգությանը, արժեքներին եւ չենք կարող որեւէ այլ անձի միջոցով դա փոխանցել։ Իմանալով, որ ՀՀ վարչապետն այս պահին կառավարության շենքում է , ուզում ենք, որ նա մոտենա մեզ եւ մենք ներկայացնենք, թե ինչ է տեղի ունեցել այս ընթացքում Հայաստանում եւ ինչ վնաս է հասցվում մեր արժեքներին»,- կառավարության շենքի առջեւ ընթացող բողոքի ակցիայի ժամանակ հայտարարեց Դիրքապահ» քառօրյա պատերազմի մասնակիցների միավորում ՀԿ հիմնադիր Մանուել Մանուկյանը։

Ապրիլյան պատերազմի մասնակիցները Ազատության հրապարակից քայլերթով շարժվել են կառավարության շենքի մոտ՝ ի նշան բողոքի։ Երիտասարդները նշում են, որ իրենց պայքարն ապաքաղաքական է ՝ հանուն արժեքների ու սուրբ հողի է, որը արյան գնով է պաշտպանվել։

Ակցիայի մասնակիցը նշեց, որ իրենք էլ են մասնակցել հեղափոխությանը. «Որեւէ այլասերվածի հովանավորի, որեւէ ազգային արժեք քանդողի, եկեղեցու դեմ գործընթաց իրականացնողի համար չի եղել մեր պայքարը, մենք հրաժարվելու ենք այդպիսի մարդկանցից եւ նրանք չեն կարողանալու մեր երկիրը ներկայացնել»։

«Դիրքապահ» Քառօրյա պատերազմի մասնակիցների միավորում»-ն իր դաշնակիցն է համարում բոլոր նրանց, ովքեր առանց քաղաքական ենթատեքստերի պայքարում են հանուն ազգայինի պահպանման։ Միևնույն ժամանակ երիտասարդները շեշտում են՝ իրական պայքարողների ձայնը այսօր լռեցվում է նախկին թալանչիների անվան տակ։

«Նոր իշխանության օրոք շատ լուրջ խնդիրներ ծածկվում են, երբ ասում են, թե թալանչիներն են անում, գողերն են անում եւ իսկական արդար մարդկանց ձայնը լսելի չի դառնում»,-հայտարարեց ակցիայի մասնակիցը։

Երիտասարդները, սակայն, թղթապանակը չկարողացան փոխանցել վարչապետին կամ օգնականներից որեւէ մեկին։ Փոխարենը կառավարության շենքի մոտ պատ կազմած ոստիկանությունը տեղեկացրեց, որ այն կարող են թողնել նամակների բաժնում, ինչը չգոհացրեց երիտասարդներին։

«Դուք ուզում եք թաքուն, մենք չենք ուզում թաքուն, մենք ուզում ենք հանրային ձեւով։ Ով, որ ուզում է թաքուն, ուրեմն , կեղտոտ բաներ կան, ենք մաքուր մարդիկ ենք, մենք հանրային ձեւով ենք ուզում»,-շեշտեց բողոքի ակցիայի մասնակիցը։

Մանրամասները տեսանյութում

Աղբյուր` Փաստինֆո