Փաստ ինֆո

Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, այսօր շարունակվել է քրեական հեղինակություն համարվող Արտյոմ Կանեւսկոյի՝ Արտյոմ Հարությունովի գործով դատական նիստը։ Հիշեցնենք, որ վերջինս մեղադրվում է ապօրինի զենք պահելու մեջ։

Հարությունովի պաշտպանների միջնորդությամբ՝ դատական նիստում հարցաքննվեցին, այսպես ասած, պաշտպանական կողմի վկաները, որոնք հայտարարեցին, թե իրենց նկատմամբ բռնություն է գործադրվել։

Հրավիրված վկաներից առաջինը՝ Միրզոյանը, ցուցմունքում նշեց, որ զենքը մեքենայից հանել են խուզարկության ժամանակ, սակայն ոստիկանները խուզարկությունն իրականացրել են առանց իր ներկայության։
Պատասխանելով՝ մեղադրող դատախազ Հայկ Խաչատրյանի հարցերին՝ Միրզոյանն ասաց, որ ոստիկանության աշխատակիցների կողմից իրականացված գործողությունների վերաբերյալ դժգոհությունը հայտնել է այդ պահին՝ ոստիկաններին։

Միրզոյանի հարցաքննությունից հետո մեղադրող դատախազը նշեց, որ վկաների հարցաքննությունները որևէ նշանակություն չեն կարող ունենալ, քանի որ պաշտպանական կողմի միջնորդությամբ ներկայացված բոլոր վկաները կարող են նմանատիպ ցուցմունք տալ՝ ասելով, որ որևէ առնչություն չունեն Կանեւսկոյի հետ։

Պաշտպան Հովսեփ Սարգսյանի միջնորդությամբ ներգրավված մյուս վկան՝ Գրիգորյանը, ինչպես և նախորդ հարցաքննվող վկան, նշեց, որ Հարությունովին ճանաչում է մարզասրահից։ Անդրադառնալով՝ ոստիկանների կողմից իրականացված խուզարկությանը, վերջինս նշեց, որ ոստիկանները եղել են դիմակավորված և խուզարկության ընթացքում բոլորին պառկեցրել են գետնին՝ ուժ գործադրել։ Սակայն հայտնեց, որ իր նկատմամբ բռնություն չի գործադրվել, քանի որ նոր էր վիրահատվել։

Որպես վկա դատակոչված Գևորգյանը նշեց, որ բերման ենթարկելիս մեքենայից իրեն հանել են բռնությամբ՝ «հանել շպրտելով»։ Վերջինս նշեց, որ իր անունով հաշվառված զենք ունեցել է և, որ իրենից բացի զենք է ունեցել նաև որպես վկա դատակոչված Միրզոյանը։
Պատասխանելով՝ դատախազ Խաչատրյանի այն հարցին, թե ինչո՞վ է պայմանավորված վերջիններիս զարմանքը, որ մեքենան կանգնեցրել են զենք-զինամթերք պահելու կասկածանքով՝ վկան ասաց, թե զարմացել է իրավապահ մարմինների մոտեցման ձևից։
Դատական նիստին ներկայացած 4-րդ վկան՝ Մադոյանը, եւս նշեց, որ իրեն բերման են ենթարկել առանց որևէ պատճառ մատնանշելու՝ բռնություն գործադրելով։ Պաշտպանի հարցին, թե արդյո՞ք մեքենայում զենքեր եղել են, վերջինս պատասխանեց, որ տղաների անունով գրանցված զենքեր եղել են։

Սույն գործով հրավիրված վկա Ա․ Գևորգյանի խոսքով՝ իրենք հայտնել են, որ իրենց մոտ գտնվող զենքերն օրինական են, այսինքն՝ գրանցված, սակայն իրավապահ մարմինները առգրավել են այն և տեղափոխել Ոստիկանության 6-րդ վարչություն։

Բռնի գործողությունների մասին հայտնեց նաև Գևորգյանը։

«Ես ղեկին նստած, դուռը բացել են և միանգամից իջեցրել են ասֆալտին՝ քաշել գցելով »,- ասաց Գևորգյանը՝ պատասխանելով Կանեւսկոյի պաշտպանի հարցերին։
Նրա խոսքով՝ մեքենայի խուզարկության պահին վերջինս չի տեսել Հարությունովին, չի նկատել նաև խուզարկության ենթարկված այլ անձանց՝ ուշադրություն չի դարձրել։

Վերջինս վստահեցնում է, որ պայուսակների խուզարկության պահին իր պայուսակը բացել է անձամբ, մինչդեռ՝ նախորդ վկաներն ասել էին, որ պայուսակները բացել են իրավապահ մարմինները։ Նրա խոսքով՝ ինքն է խնդրել իրավապահ մարմիններին, որ անձամբ ցուցադրի պայուսակի պարունակությունը։

Վկա Թամրազյանը, ով նաև Կանեւսկոյի մորաքրոջ որդին է, նշեց, որ մարզասրահ է գնում բժիշկների հսկողությամբ՝ ունի հաշմանդամություն։ Վերջինիս խոսքով՝ մարզասրահում երկու ժամ պարապելուց հետո տուն է գնացել մեքենայով, որը վարում էր Արտյոմ Հարությունովը։ Նրա խոսքով՝ ճանապարհին գազանաբար հարձակվել են մեքենայի վրա, որից հետո նոր են իմացել, որ իրենց վրա «հարձակվողները» ոստիկաններ են ։

«Նրանց մեքենաները ոստիկանական չեն եղել»,- ասաց Թամրազյանը։
Կանեվսկոյի մորաքրոջ որդու խոսքով՝ ոստիկաններն իմացել են, որ ինքն ունի հաշմանդամություն՝ «փռել են ասֆալտին», սակայն ձեռնաշղթա չեն կարողացել հագցնել դրանց փոքր լինելու պատճառով։ Վերջինս նաև հայտնեց, որ ոստիկանները եղել են սև շորերով և դիմակավորված։ Վկան պատմեց, որ իրեն տեղափոխել են Ոստիկանության 6-րդ վարչություն՝ թողնելով բաց դռներով մեքենան։

«Ինձ անձամբ տեղափոխել են ահաբեկչության բաժին»,- ասաց Թամրազյանը։
Նրա խոսքով՝ իր ներկայությամբ մեքենայի զննություն կամ խուզարկություն տեղի չի ունեցել։

Պատասխանելով մեղադրող դատախազի հարցերին՝ Թամրազյանը նշեց, որ նախաքննության փուլում իրեն չեն հարցաքննել։
«Վստահություն չունեմ իրավապահների նկատմամբ»,- ասաց Թամրազյանը՝ հավելելով, որ անձնական դրդապատճառներով ցուցմունք չի տվել։

Մեղադրող դատախազը միջնորդություն ներկայացրեց հաջորդ դատական նիստին հրավիրել նաև վկա Մյասնիկ Մատինյանին և հրապարակել վերջինիս ցուցմունքը։ Նշված միջնորդության քննարկումը հետաձգվեց, քանի որ դեռ չի ավարտվել պաշտպանության կողմի հրավիրած վկաների հարցաքննությունը։

Արտյոմ Կանեւսկոյի գործով հաջորդ դատական նիստը կկայանա նոյեմբերի 20-ին, ժամը՝ 14:00-ին։

Հեղինակ՝ Իզաբել Սահակյան

Աղբյուր` Փաստինֆո